نورالله ځاځی

د افغانستان د سترې محکمې قضایي پلاوي ویلي چې له ایرانه افغانستان ته د افغان زندانیانو د لېږد بهیر ته بشپړ چمتووالی لري او له هغه هېواده یې غوښتي چې د زندانیانو د هویت له تثبیت وروسته دغه بهیر ژر تر ژره پیل کړي.

کابل کې د روسیې سفارت فرهنګي برخې مسوولین وايي چې هېواد یې چمتو دی څو د تخنیکي او مسلکي زده‌کړو له ادارې سره په بېلابېلو علمي او تخنیکي برخو کې همکاري وکړي.

د افغانستان د عدلیې وزارت سرپرست په کابل کې د ترکیې له سفیر سره په لیدنه کې ټینګار کړی چې د اسلامي امارت او ترکیې ترمنځ دې همکارۍ لا پراخې شي.

د کډوالو چارو وزارت وايي، د روان ۲۰۲۵ زېږدیز کال له پیله تر اوسه د پاکستان له بندخونو ۸۸۲ افغان کډوال ازاد شوي خو ۸۴ نور لا هم بندي دي چې د خلاصون لپاره یې جدي هڅې روانې دي.

د سترې محکمې اداري مرستیال له ایرانه غوښتي چې پر اعدام له محکومو افغان زندانیانو سره د اسلامي اخوت له مخې نرمي وکړي او د دغو کسانو نومونه دې له افغان حکومت سره شریک کړي.

د کډوالو چارو وزارت نوی سرپرست وزیر وايي چې د دغه وزارت ټول مسوولین او کارکوونکي دې خپلو کارونو ته د تېر په څېر دوام ورکړي، د منفکۍ یا تبدیلۍ په اړه دې اندېښنه نه کوي.

د ریاست‌الوزراء اداري مرستیال د سره صلیب او سرې میاشتې ټولنې د نړۍوال فدراسیون د آسیا پاسیفیک حوزې له رییس سره په لیدنه کې غوښتي چې له افغان ولس او اجباري راستانه شوو کډوالو سره خپلو مرستو ته دوام ورکړي.

د علومو اکاډمۍ له لوري کابل کې د حضرت ضیاء المشایخ محمد ابراهیم جان مجددي د شهادت د ۴۶ تلین په یاد غونډه جوړه شوه.

د راپورونو له مخې، د خیبرپښتونخوا کرمې ته په روان کاروان باندې برید شوی چې په پایله کې لس کسان وژل شوي او شپږ موټرچلوونکي یرغمل شوي دي.

د ایران ولسمشر د روسیې له ولسمشر سره یوه هراړخیزه ستراتیژیکه هوکړه لاسلیک کړه چې له مخې به یې د دواړو هېوادونو ترمنځ د اقتصادي او پوځي اړیکو پیاوړتیا ته لار هواره شي.

د راپورونو له مخې، د پاکستان یوې محکمې د یاد هېواد پخوانی لومړی وزیر عمران خان پر ۱۴ کاله او د هغه مېرمن پر اووه کاله بند محکوم کړل.

د راپورونو له مخې، د اسرائیل د حکومت کابینې په غزه کې له حماس ډلې سره د اوربند هوکړه منظوره کړه.