د افغانستان او ترکیې ترمنځ د همکاریو د پیاوړتیا پر اړتیا ټینګار وشو

<p style="text-align: justify;">کابل (پژواک، ۳۰ مرغومی ۱۴۰۳): د افغانستان د عدلیې وزارت سرپرست په کابل کې د ترکیې له سفیر سره په لیدنه کې ټینګار کړی چې د اسلامي امارت او ترکیې ترمنځ دې همکارۍ لا پراخې شي.</p>

<p style="text-align: justify;">د عدلیې وزارت خبرپاڼه کې راغلي چې د یاد وزارت سرپرست شيخ عبدالحکیم شرعي نن په افغانستان کې د ترکیې له سفیر جنګ اونال او د هغه له مل پلاوي سره لیدلي.</p>

<p style="text-align: justify;">خبرپاڼه کې راغلي، په دې لیدنه کې دواړو لورو د دواړو اسلامي هېوادونو ترمنځ د همکاریو د پیاوړتیا پر اړتیا ټینګار وکړ.</p>

<p style="text-align: justify;">خبرپاڼه کاږي، د عدلیې وزارت سرپرست افغانستان او ترکیه له ګډو دیني او فرهنګي مشترکاتو سره دوه اسلامي هېوادونه وبلل او ټینګار یې وکړ چې اړتیا ده د اسلامي امارت او ترکیې ترمنځ همکارۍ لا زیاتې پراخې شي.</p>

<p style="text-align: justify;">هغه دغه راز وویل، اسلامي امارت د اصولو او ضوابطو له مخې د نړۍ له ټولو هېوادونو په ځانګړي توګه اسلامي هېوادونو سره د خپلو بهرنیو اړیکو پراخولو ته ژمن دی.</p>

<p style="text-align: justify;">د خبرپاڼې په حواله، کابل کې د ترکيې سفیر ټینګار وکړ چې د ترکیه او افغانستان  له یو بل سره وروڼه دي او هېواد يې ژمن دی چې په بېلابېلو برخو کې له اسلامي امارت سره همکاري ولري.</p>

<p style="text-align: justify;">هغه زیاته کړه چې د ترکیې ولسمشر په افغانستان کې پرمختګونه په دوامداره توګه تعقیبوي او هدایت یې ورکړی چې له اسلامي امارت سره اړیکې لازیاتې پياوړې شي.</p>