روسیه د افغانستان د تخنیکي او مسلکي زده‌کړو له ادارې سره په بېلابېلو برخو کې همکاري کوي

کابل (پژواک، ۳۰ مرغومی ۱۴۰۳): کابل کې د روسیې سفارت فرهنګي برخې مسوولین وايي چې هېواد یې چمتو دی څو د تخنیکي او مسلکي زده‌کړو له ادارې سره په بېلابېلو علمي او تخنیکي برخو کې همکاري وکړي.

د تخنيکي او مسلکي زده‌کړو ادارې خبرپاڼه کې راغلي چې د یادې ادارې سرپرست مولوي غلام حیدر شهامت په افغانستان کې د روسیې سفارت د فرهنګي برخې له مسوولینو سره ولیدل.

خبرپاڼه کې راغلي، په دې لیدنه کې دواړو خواوو د ګډو همکارو په ګډون پر بېلابېلو موضوعاتو خبرې وکړې.

خبرپاڼه کاږي، د روسیې سفارت د فرهنګي برخې مسوولینو وویل، هېواد یې چمتو دی چې د تخنیکي او مسلکي زده‌کړو له ادارې سره په بېلابېلو علمي او تخنیکي برخو کې همکاري وکړي.

هغو د افغانستان له خلکو سره پر دوامداره ملاتړ او همکارۍ هم ټینګار وکړ.

د خبرپاڼې په حواله، د تخنیکي او مسلکي زده‌کړو ادارې سرپرست په دې لیدنه کې وویل چې دا اداره د تخنیکي او مسلکي زده کړو د وړاندې کولو لارې د هېواد په اقتصادي وده او ځان بسیاینې کې مهم رول لوبوي.

هغه زیاته کړه، د تخنیکي او مسلکي زده کړو اداره چمتو ده څو د حکومت د پالیسیو پر بنسټ په تخنیکي او علمي برخو کې له روسیې سره هر اړخیزې همکارۍ ولري.

د خبرپاڼې د معلوماتو له مخې، په ورته وخت کې د روسیې سفارت د فرهنګي برخې مسوولینو د تخنیکي او مسلکي زده کړو له ادارې سره د ښوونیز نصاب د چاپ او نورو برخو کې د همکارۍ ژمنه وکړه.