احمدشاه عرفانیار

تېره اونۍ، ملګرو ملتونو افغانستان کې د بشري حقونو او القاعدې د شتون په اړه اندېښنه وښوده، خو ا.ا رد کړه او د هند او روسیې مشرانو افغانستان کې د «ترهګرۍ» ضد ګامونه وستایل.

تېره اونۍ، دوحه کې د افغانستان په اړه غونډې د خبرونو سرټکي جوړول، د شانګهای همکاریو سازمان باثباته افغانستان د سیمې په ګټه وباله او ځینو هېوادونو افغانستان کې د ټول‌ګډونه حکومت د جوړښت غوښتنه کوله خو ا.ا وایي، د حکومت څرنګوالی کورنۍ موضوع ده.

ملي دفاع وزارت وايي، پکتیکا کې يې یو هایلکس موټر، څلور کلاشینکوفونه او یوه روسۍ پیکا چې په یوه کور کې په ناقانونه ډول ساتل کېدل، نیولي دي.

د ټولګټو چاور وزارت وايي، د کابل – کندهار لویه لار د میدان‌وردګ ولایت د سیداباد ولسوالۍ اړوند سیمه کې پر دغه سړک د قیراچونې له امله د دوو ورځو لپاره د باروړونکو او لویو مسافروړونکو موټرو پر مخ تړل کېږي.

د پوهنې وزارت وايي، د سړو ولایتونو ښوونځیو څلورنیم میاشتنۍ ازموینې راتلونکې شنبې (د چنګاښ ۱۶مه) پیلېږي او د روانې میاشتې تر اخره پای ته رسېږي.

د ا.ا ویاند وایي، د دوحې غونډه ډېره ښه روانه ده، په دې ناسته کې د روسيې، چین، ایران، پاکستان، قزاقستان، ازبکستان، قرغزستان، ترکمنستان، امریکا او د اسلامي همکاریو سازمان دریځونه د ستایلو وړ وو.

د دوحې ناستې د لومړۍ ورځې له غونډې وروسته د ا.ا ویاند ویلي چې د غونډې عمومي فضا ډېره ښه وه او د م.م د سرمنشي مرستیالې هم ویلي چې دغه غونډه ډېره ګټوره پیل شوه.

تېره اونۍ، روسیې د دوحې ناسته د ا.ا او نړۍوالې ټولنې ترمنځ د رغنده رول لپاره مهمه وبلله، امریکا وویل چې استازي یې له افغان ښځو او مدني ټولنې سره د مانالرونکي تعامل په تړاو له ډاډمنېدو وروسته ګډون په کې کوي او د ا.ا ویاند وایي چې دې ناستې ته د «تفاهم او ستونزو د حل» په موخه ورځي.

د افغانستان بانک وایي، د دغه بانک سرپرست د اسلامي مالي خدمتونو بورډ کلنۍ غونډه کې د ګډون په موخه جیبوټي هېواد ته ولاړ.

په څلورو ولایتونو کې ۱۶ کسان د بېلابېلو جرمونو په تړاو نیول شوي، ۳۲ پر نشه‌یي توکو روږدي له درملنې وروسته خپلو کورنیو ته سپارل شوي او ۸۴ نور روږدي د درملنې په موخه راټول کړای شوي دي.

تېره اونۍ، ا.ا د دوحې ناسته کې د ګډون پرېکړه وکړه، یوناما دغه ناسته د افغانستان پر مسایلو د بحث لپاره حیاتي میکانیزم وباله او م.م د افغانستان په اړه دوه راپورونه خپاره کړل، خو ا.ا له حقیقته لرې وبلل.

د کورنیو چارو وزارت وايي چې د لوی اختر لومړۍ ورځ د هېواد په ۳۴ ولایتونو کې په بشپړه توګه د امن او خوښۍ په فضا کې سرته ورسېده.