کابل (پژواک،۱۴ لړم ۱۴۰۳): د ملګرو ملتونو سازمان د وګړو صندوق حوزوي رییس د عامې روغتیا وزارت له سرپرست سره په لیدنه کې ویلي چې له افغانستان سره د روغتیا برخه کې خپلو همکاریو ته دوام ورکوي.
د عامې روغتیا وزارت د یوې خبرپاڼې په خپرولو لیکلي چې د دغه وزارت سرپرست مولوي نورجلال جلالي د ملګرو ملتونو د وګړو صندوق (UNFPA) له حوزوي رییس پیوسمیت سره نن (د لړم ۱۴مه) په خپل کاري دفتر کې ولیدل.
سرچینې لیکلي چې په یاده لیدنه کې دواړو خواوو په افغانستان کې د روغتیايي ځالو ډېرولو، په سپینو سیمو کې د نوو روغتیايي مرکزونو جوړېدو، د ګرځنده روغتیايي ټیمونو د کیفیت ارزونې او ثابتو مراکزو ته بدلولو ، د مور او ماشوم برخې خدماتو کې د اسانتیاوو رامنځته کېدو او په دې برخو کې د نړیوالو مرستو د جلب اړوند بحث او خبرې ترسره شوې.
د عامې روغتیا سرپرست وزیر د افغانستان روغتیايي سیستم د پیاوړتیا لپاره د نړۍوالو روغتیايي ادارو مرسته اړینه وبلله او د یاد سازمان له حوزوي مشر یې وغوښتل څو مرستې دې له دغه وزارت سره په همغږۍ ترسره شي.
په یاده خبرپاڼه کې د سازمان د حوزوي رییس له قوله راغلي: «موږ هڅه کوو څو په افغانستان کې د خدمتونو د پراختیا په موخه روغتیايي ځالې زیاتې او په دې برخه کې خپلو چارو ته لا دوام ورکړو.»
نوموړي همداراز د روغتیايي سیستم د پیاوړتیا په برخه کې د نړۍوالو مرستو د جلب ډاډ ورکړ.
GET IN TOUCH
NEWSLETTER
SUGGEST A STORY
PAJHWOK MOBILE APP