نورالله ځاځی

کابل کې د چین سفیر د کډوالو او راستنېدونکو چارو وزارت سرپرست سره په لیدنه کې ویلي چې هېواد یې چمتو دی څو افغان کډوالو ته د ښارګوټو جوړولو برخه کې مرسته وکړي.

د کډوالو او راستنېدونکو چارو وزارت له دوو موسسو سره د څه باندې یو میلیون امریکايي ډالرو په ارزښت د همکارۍ دوه هوکړه‌لیکونه لاسلیک کړل.

د احصایې او معلوماتو ملي اداره وايي، د افغانستان تر کښت لاندې ټوله کرنیزه ځمکه درې میلیون هکټارو ته رسېږي چې له دې جملې ۲،۱ میلیون هکټاره اوبیزه او ۹۱۷ زره هکټاره یې للمي ده.

د مالیې وزارت وايي، د فراه ولایت په ابو نصر فراهي ګمرک کې د کارکوونکو لپاره د ۱۲،۸ میلیون افغانیو په لګښت عصري لیليه جوړه شوه.

د ریاست‌الوزراء اقتصادي معاونیت وايي، ملي تدارکاتو کمېسیون د شاوخوا درې میلیارد افغانیو په ارزښت د ۲۷ پروژو تړونونه منظور او د ۷ نورو یې تعدیل کړل.

د افغانستان بانک سرپرست د ملګرو ملتونو د سرمنشي له ځانګړې استازې سره په لیدنه کې ویلي، دغه بانک ژمن دی چې په هېواد کې کوچنيو مالي تمویلاتو ته وده ورکړي څو د هېواد په ټولو برخو کې خلک له دې مالي خدمتونو برخمن شي.

د روسیې ولسمشر وايي چې مسکو د روسیې او اوکراین ترمنځ د سولې په خبرو کې د اروپایي هېوادونو له ګډون سره مخالفت نه کوي او په خبره یې، د امریکا ولسمشر د روسیې او اوکراین له جګړې سره منطقي چلند کوي.

د سعودي عربستان د ملک سلمان بنسټ او د روغتیا نړۍوال سازمان ترمنځ د ماشومانو ګوزڼ (پولیو) ویروس مخنیوي په موخه د ۵۰۰ میلیون امریکايي ډالرو په ارزښت هوکړه‌لیک لاسلیک شو.

د کډوالو په چارو کې د ملګرو ملتونو عالي کمېشنرۍ او د جاپان حکومت ترمنځ د شپږ میلیون امریکايي ډالرو په ارزښت تړون لاسلیک شو.

د کورنیو چارو وزارت له نشه‌یي توکو سره د مبارزې د مرستیال ملا عبدالحق اخند همکار په مشرۍ یو پلاوی د ایران په رسمي بلنه دغه هېواد ته سفر وکړ.

د ریاست‌الوزراء اقتصادي مرستیال، کابل کې د اوبو نړۍوال څېړنیز کنفرانس کې د اوبو پر مدیریت ټینګار وکړ، ویې ویل چې افغانستان د اوبو پراخې سرچینې لري خو په معاصر تاریخ کې ورسره مسلکي او ملي چلند نه دی شوی.

د احصایې او معلوماتو ملي اداره وايي، د تېرې یوې میاشتې په اوږدو کې یې افغانستان ته د هوايي ډګرونو او ځمکنيو بندرونو له لارې د ۲۴۶۵ بهرنیو وګړو تګ راتګ ثبت کړی دی.