<p style="text-align: justify;">جلالاباد (پژواک، ۱۶ غويی ۱۴۰۲): د ننګرهار په مرکز او ولسوالیو کې تېره شپه د تېز باران اورېدو او سېلابونو له امله څلور ماشومان مړه او ٢٥ نور کسان ټپيان شوي دي.</p>
<p style="text-align: justify;">د ننګرهار ولايت مقام مطبوعاتي دفتر له خوا د غويي په ۱۶مه پژواک خبري اژانس ته رالېږلې خبرپاڼه کې راغلي چې د تېرې شپې اورښت او سېلابونو د دغه ولایت په کامې ولسوالۍ کې د نورو سیمو په پرتله ډېر زيان اړولی دی.</p>
<p style="text-align: justify;">خبرپاڼه کاږي، د لومړنيو معلوماتو پر بنسټ، په یادې ولسوالۍ کې تر دې مهاله د څلورو ماشومانو د مړينې خبر ورکړل شوی چې د درېيو هغو جسدونه پيدا شوي او یو نادرکه دی.</p>
<p style="text-align: justify;">دغه راز سرچينه زياتوي چې د دغه باران، ږلۍ او سېلاب له امله ٢٥ نور کسان ټپيان شوي هم دي.</p>
<p style="text-align: justify;">بلخوا د ننګرهار د اطلاعاتو او کلتور رياست د اطلاعاتو امر صديقالله قريشي بدلون هم پژواک ته تاييد کړه چې اورښت او سېلابونو د دغه ولایت په بېلابېلو سيمو کې زيانونه اړولي چې اړوندې ادارې له خلکو سره د بېړنيو مرستو او جزئياتو پر راټولولو بوختې دي.</p>
<p style="text-align: justify;">په ورته وخت کې، د جلالاباد ښاروالۍ وياند بختيجان مراد وايي، د ښار د نهو ناحيو مسوولينو ته دنده ورکړل شوې چې په خپلو سيمو کې د اړتيا پر مهال له خلکو سره بېړنۍ مرستې وکړي.</p>
<p style="text-align: justify;">د ننګرهار د پوهنې رياست وياند فرهاداحمد ستانکزی هم تاييدوي چې د تېرې شپې اورښت ځيني ښوونځي تخريب کړي چې دوی يې په راپور چمتو کولو بوخت دي.</p>
<p style="text-align: justify;">په همدې حال کې، عام خلک له زيانمنو سره د مرستو غوښتنه کوي.</p>
<p style="text-align: justify;">د ننګرهار د کامې ولسوالۍ یوه اوسېدونکي عزیزالله وویل، تېره شپه د دې ولسوالۍ په میرزاخېلو، بازديخېلو او ماماخېلو سیمو کې سېلابونه راوتلي چې ځایي خلکو ته یې د سر او مال زیانونه اړولي دي.</p>
<p style="text-align: justify;">هغه زياته کړه، حکومت دې په بېړني ډول خلکو ته مرستې ورسوي؛ ځکه د ډېرو خلکو کورونه نړېدلي او په ميدان پاتې دي.</p>
