کابل (پژواک ١٩ ورى ٩٢): ولسي جرګې د کونړ په هوايي بريد کې د ملکي وګړو وژنه په کلکه وغندله او د دې پېښې د څېړلو او عاملينو ته يې د محاکمې غوښتنه وکړه.
د سيمه ييزو چارواکو په وينا، دوه ورځې وړاندې د شيګل ولسوالۍ په شلتن دره کې د ايساف ځواکونو په هوايي بريد کې ١١ ماشومان، چې عمرونه يې له ٧ کلونو ټيټ وو، ووژل شول او شپږ ښځې په کې ټپيانې شوې.
خو د ولسي جرګې ځينو غړو نن د جرګې په عمومي ناسته کې د يادې پېښې عاملين په کلکه وغندل او د هغوى د محاکمه کېدو غوښتونکي شول.
هغوى د ملکي وګړو د وژنې په غبرګون کې پوښتنه وکړه، چې ولې ايساف او افغان ځواکونو مخکې له دې ، چې عمليات ترسره کړي، ملکي وګړي او د اوسېدو سيمې نه په نښه کوي او وروسته له هغه عمليات نه ترسره کوي؟
د جرګي د غړو په وينا، بايد وړاندې تر دې چې بهرني ځواکونه په کوم ځاى کې د وسله والو مخالفينو پر ضد عمليات ترسره کوي، هغه ښه په نښه او وروسته له هغه لاس په کار شي.
په ولسي جرګه کې د کونړ د خلکو استازي شهزاده شاهد بيا په دې پېښه کې د وژل شوو شمېر ١٣ تنه وښود او ويې ويل، چې په هوايي بريدونو کې ملکي وګړو ته مرګ ژوبله د ملت د ژورې خواشينۍ لامل ګرځي.
هغه زياته کړه: ((دوه شپې وړاندې هم د وژل شوو په منځ کې ډېرى ماشومان وو؛ د داسې عملياتو د ترسره کېدو له امله هېڅ يو ولايتي چارواکى له دندې نه دى ګوښه شوى او ولې دا عمليات د ځمکي له لارې نه ترسره کېږي؟))
د کابل ولايت د خلکو استازې نظيفه ذکي هم د عملياتو پر مهال د ملکي وګړو وژل وغندل او ويې ويل: ((د دغه ستر جنايت له ترسره کېدو وړاندې بايد د وسله والو طالبانو او ملکي وګړو ترمنځ تشخيص وشي او وروسته عمليات ترسره شي.))
دغې ښځينه وکيله د يادې پېښې د جدي څېړلو غوښتونکې شوه او زياته يې کړه، چې د دا ډول پېښو عاملين بايد مجازات شي.
د ولسي جرګې لومړي مرستيال ميرويس ياسيني د جرګې امنيتي کمېسيون ته دنده وسپارله، چې يو پلاوى دې وګوماري او کونړ ولايت ته دې د پېښې د څېړلو په موخه ولېږي.
تېره ورځ ولسمشر کرزي هم ياده پېښه غندلې وه او د پېښې د څېړلو لپاره يې کونړ ته د يوه پلاوي د لېږلو امر کړى و، ترڅو ياده پېښه له نږدې وڅېړي.
خو ايساف ځواکونه وايي، چې په شيګل ولسوالۍ کې د ملکي وګړو د مرګ ژوبلې راپورونه يې جدي نيولي او په دې اړه يې پلټنې پيل کړې دي.
له بلې خوا د شيګل ولسوال عبدالظاهر وايي، هغه ځاى بمبار شوى، چې طالبان په کې راغونډ شوي وو.
نوموړى زياتوي، په دغه بريد کې د طالب د قوماندان کور په نښه شوى، دى او نور ماشومان په کې وژل شوي دي.
خو طالبانو يواځې په دې پېښه د شپږو عادي طالبانو وژل کېدل منلي دي.
Views: 2
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن