محمودراقي (پژواک، ٣٠ غويى ٩٥): د کورنيو چارو وزارت له خوا د کاپيسا د امنيې قوماندانۍ په تېلو کې د فساد په تور د دغه ولايت د امنيه قوماندان دنده تعليق شوې ده.
د کاپيسا د ولايتي شورا رييس حسين سنجي د غويي په ٣٠مه پژواک خبري اژانس ته وويل، نن د کورنيو چارو وزارت له خوا ولايت ته يو شفر راغلى و.
هغه زياته کړه چې په دغه شفر کې ويل شوي چې تر دويم حکمه پورې د دغه ولايت د امنيه قوماندان مل پاسوال عبدالکريم فايق دنده تعليق شوې ده.
د ولايتي شورا رييس په دې اړه نور معلومات ورنه کړل.
پژواک هڅه وکړه چې په دې اړه د ولايت مقام او د امنيه قوماندان نظر واخلي، خو له هغوى سره اړيکه ټينګه نه شوه.
تر دې مخکې د کورنيو چارو وزارت ويلي وو چې د کاپيسا په امنيې قوماندانۍ کې د تېلو په قراردادونو کې د فساد موضوع تر څېړنې لاندې ده او د تورنو کسانو دوسيې څارنوالۍ ته استولې دي.
څو موده مخکې د دغه د درنو جرمونو د څېړنې رياست له خوا يو پلاوى کاپيسا ولايت ته استول شوى و، څو د دغه ولايت په امنيې قوماندانۍ کې د لسګونو زره لېتره تېلو د غلا او فساد په اړه پلټنې وکړي.
دغه پلاوي د امنيې قوماندانۍ يو شمېر کارکوونکي نيولي او کابل ته يې د نورو پلټنو لپاره لېـږلي دي.
د کورنيو چارو وزارت د اداري فساد پر وړاندې د ادارې مسوول حبيب الرحمن سحر پژواک خبري اژانس ته ويلي وو چې د کاپيسا د امنيې قوماندانۍ د فساد او د تېلو د غلا په اړه دوسيې يې څارنوالۍ ته استول شوې دي.
د کاپيسا امنيه قوماندان مل پاسوال عبدالکريم فايق ويلي وو: ((په دې قضيه کې ډېر لاسونه ښکېل دي، مو له هېچا نه وېريږو، موږ له کوم خنډ پرته به په کاپيسا ولايت کې قانون پلى کوو.))
د امنيه قوماندان په وينا، که هر څوک کومه ادعا لري، نو محکمې او څارنوالۍ ته دې مراجعه وکړي، که څوک مجرم وپېژندل شو، بايد د قانون له مخې خپله جزا وويني.))
هغه پر اړوندو ادارو غږ وکړ، د هغو کسانو پر وړاندې دې اقدام وکړي او لاسونه يې لنډ کړي چې بې ځايه تورونه يې پورې کړي دي.
غړيYou need to subscribe to view the full article. Please login or register a new account.










