پل علم (پژواک، ٢٦ لړم ٩٥): د لوګر په مرکز پل علم کې د ٦٥ ميليونه افغانيو په لګښت درې زره کورنيو ته د څښاک پاکې اوبه برابرېږي.
د لوګر په مرکز پل علم ښار کې د يادې پروژې د جوړېدو د بنسټ ډبره پرون کېښودل شوه.
په يادو مراسمو کې د لوګر والي محمدحليم فدايي وويل چې دغه پروژه به د يو کال په موده کې بشپړه شي او لګښت يې هم د ښار جوړونې وزارت له لوري ورکول کېږي.
فدايي وايي: ((په دې پروژه ٦٥ ميليونه افغانۍ لګښت راځي او درې زره کورنيو ته د څښاک پاکې اوبه برابروي.))
د فدايي د معلوماتو له مخې، دغه پروژه به درې ژورې څاګانې، يو لوى جنراتور، دوه د اوبو پمپونه او يوه لويه ذخيره ولري چې د ١٢زره متره مکعبه اوبو د زېرمه کولو وړتيا به ولري.
په دغو مراسمو کې د لوګر د ولايتي شورا غړي سيد قريب الله سادات پژواک ته وويل: ((اوبه او برق ډېر مهم دي او دا ډېر ښه کار وشو چې د اوبو دغه پروژه دلته عملي کېږي.))
دغه راز د اجمل په نوم د پل علم ښار اوسېدونکي پژواک ته وويل چې اوسمهال د دغه ولايت ګڼ شمېر اوسېدونکي د څښاک پاکو اوبو ته لاسرسی نه لري.
هغه وايي: ((تر اوسه په پل علم کې څوک په کور کې نل نه لري ځينو کسانو بمبې جوړې کړې خو ځيني نور بيا له پخوانيو څاګانو استفاده کوي.))
لوګر د پلازمېنې کابل سوېل ته په ٣٥ کيلومترۍ کې پروت ولايت دى چې ځيني سيمې نا امنه هم دي.
غړيYou need to subscribe to view the full article. Please login or register a new account.
