پل علم (پژواک،۲۷ لیندۍ ۹۵): چارواکي وايي چې ناپېژاندو وسله والو د لوګر په محمد اغې ولسوالۍ کې د نجونو یو ښوونځی سوځولی دی.
د لوګر د پوهنې ریاست ویاند شاپور عرب د لیندۍ په ۲۷مه پژواک خبري اژانس ته وویل چې بېګا ناپېژانده وسله والو د محمد اغې ولسوالۍ د کتب خېلو په کلي کې د شهید شهسوار د نجونو منځني ښوونځي ودانۍ په بشپړه توګه سوځولې ده.
عرب زیاتوي، د وسله والو یوه ډله لومړی ښوونځي ته ننوتلې، ساتونکی یې تړلی او بیا یې پر ټوله ودانی تېل شیندلي او سوځولې یې ده.
د لوګر د پوهنې ریاست ویاند وايي چې په یاده ودانۍ کې لس درسي خونې، ادارې او تدریسي اسناد، کتابونه، مېزونه او چوکۍ ټول سوځېدلي دي.
شاپور عرب د یادې پېښې له امله د اوښتي مالي زیان په اړه دقیق معلومات نه درلودل.
هغه دغه راز وايي چې په یاد ښوونځي کې ۵۵۰ نجونو زده کړې کولې.
د اجمل په نوم د کتب خېلو یوه اوسېدونکي پژواک خبري اژانس ته ویلي، دوی د شپې خبر شول چې ښوونځي ته اور اچول شوی، خو په سیمه کې د خراب امنیتي وضعیت له امله یې ونه غوښتل چې سیمې ته ورشي.
بلخوا د محمد اغې ولسوال نصیراحمد امین پژواک خبري اژانس ته د پېښې پخلی کړی او ویلي یې دي چې دوی یې په اړه پلټنې پيل کړې خو تر اوسه یې په پېښه کې د لاس لرلو په تور څوک نه دي نیولي.
د پوهنې وزارت هم د یوې خبرپاڼې په خپرولو سره چې یوه کاپي یې پژواک خبري اژانس ته هم رالېږل شوې، یاده پېښه تایید کړې او دغه کار یې د علم او پوهې د دښمنانو کار بللی دی.
په خبرپاڼه کې له امنیتي ارګانونو غوښتل شوي چې د پېښې عاملین دې ژر تر ژره د قانون منګولو ته وسپاري.
په خبرپاڼه کې ویل شوي چې د یاد ښوونځي ودانۍ یو شخصي کور و چې د پوهنې وزارت له خوا د نجونو د ښوونځي لپاره په کرایه نیول شوی و.
دا په داسې حال کې د ه چې تېره ورځ د ملي پيغام په نوم د راډیو مسوول مدیر، قاضي مدثر هم په همدې سیمه کې د نامعلومو کسانو له خوا ووژل شو.
په لوګر کې ټول ټال ۳۰۷ ښوونځي شتون لري چې ۷۰ یې ودانۍ نه لري او یو سل پنځوس زره زده کوونکي لري چې پنځوس زره یې نجونې دي.
غړيYou need to subscribe to view the full article. Please login or register a new account.
