منځپانګې ته تلل
دوشنبه ۱۶ نومبر ۲۰۲۶ · کابل ۶:۴۲ غ.م
۱° — په ټولو ولایتونو کې هوا
صاف · ↑۱۴° ↓۱°
د هوا کیفیت: منځنی
غړي

چارواکو د نوروز په جشن کې د مزارشریف د امنیت ډاډ ورکړ

· ۴ دقیقې لوستل · ۱۵۴ کتنې

مزارشريف (پژواک، ۱۵ کب ۹۶): که څه هم د بلخ اوسېدونکي د روانو سياسي کړکېچونو له امله د امنيت له پلوه په اندېښنه کې دي، خو د دغه ولايت چارواکي وايي چې سږنی نوروزي جشن به هم د تېرو کلونو په څېر ښه ترسره شي.

د جشن د چمتووالي کمېسيون د امنيتې کمېټې مسوولين وايي، د را روان جشن د امنيت نيولو لپاره يې د تېرو کلونو په پرتله کلک او نوي امنيتي تدابير نيولي دي.

د هر كال د وري په لومړۍ نېټه د بلخ په مركز مزارشريف كې د نوروز جشن د ځانګړو مراسمو په ترسره کولو نمانځل كېږي او په روضه شريفه كې د شاه ولايتمآب جنډه پورته کېږي.

په دغو مراسمو كې د هېواد له بېلابېلو ولايتونو او له هېواده بهر په زرګونو خلک او دولتي چارواکي برخه اخلي.

د نوروز جشن د ښې نمانځنې لپاره هر كال د بلخ ولايت د مقام له خوا يو كمېسيون جوړېږي، چې نهه كمېټې لري.

د بلخ ولايت مقام مطبوعاتي مسوول منير فرهاد د کب په ١٥مه پژواک خبري اژانس ته وويل چې په دغه كمېسيون كې امنيتي، فرهنګي، د ښار د پاكوالي او سينګارولو، د بيو د څارنې او كنټرول، روغتيايي او نورې كمېټې شاملې دي.

د بلخ د اطلاعاتو او كلتور رياست د دغه جشن د فرهنګي چارو د سمبالښت مسووليت لري او د جشن د لا ښه نمانځلو لپاره يې چمتووالى نيولى دى.

د بلخ د اطلاعاتو او كلتور رييس صالح محمد خليق وايي، دوى په پام كې لري چې سږني جشن کې به هم د ګډونوالو لپاره فرهنګي، هنري او ادبي پروګرامونه وړاندې کړای شي.

ده زياته كړه، د كب له ۲۹ مې به د بلخ پوهنتون په تالار او نورو بېلابېلو ځايونو كې په وړيا توګه د جشن ګډونوال د بېلابېلو سندرغاړو له سندرو خوند واخلي.

د هغه په وينا، په دغو پروګرامونو كې د هېواد د بېلابېلو ولايتونو پر سندرغاړو سربېره ځينو بهرنيو سندرغاړو ته هم بلنه ورکول کېږي.

خليق زياته کړه، د ځينو فرهنګي او ادبي ناستو تر څنګ نندارتونونه هم په پام كې لري چې د هېواد بېلابېل اديبان او شاعران او انځورګران به په كې ونډه اخلي او خپل هنري اثار به وړاندې كوي.

نوموړي زياته كړه، لنډ هنري فلمونه، انځورګري او د تصويرونو نندارتون، د كتابونو نندراتون او د نوروزي خوړو نندارتونه به هم نندراې ته وړاندې شي.

د بلخ د ښاروالۍ چارواكو هم له څه مودې راهيسې د نوي كال د جشن لپاره د مزارشريف ښار د پاكوالي او د روضې د سينګارولو كار پيل كړى دى.

ښاروال نصيراحمد عيني پژواک اژانس ته وويل چې د كب مياشتې له ۱۵مې يې د پاكولو ډلې د ښار په پاکولو بوختې دي.

هغه زياته كړه، د هر نوي كال د كب په ۲۸مه د ښاروالۍ له خوا د ښار د پاكوالي لپاره حشر نيول كېږي، چې د ښاروالۍ د بېلابېلو ادارو د كاركوونكو ترڅنګ په كې عام وګړي هم په افتخاري ډول برخه واخلي.

عيني زياته کړه، د كب له لومړۍ نېټې يې د مزارشريف د ټولو هوټلونو او مسافرخانو كتنه په دې موخه پيل كړې، چې هر هوټل او مسافرخانه د پاكوالي پام وساتي.

خو د مزارشريف اوسېدونکي وايي، د بلخ او ارګ تر منځ د روان سياسي کړکېچ له امله د امنيت له پلوه اندېښمن دي.

د مزارشريف  ښار اوسېدونکي محمد سرور پژواک ته وويل، د ارګ او بلخ تر منځ د روان کړکېچ له امله په مزارشريف ښار د غير مسوولو وسله والو ګرځېدل زيات شوي دي.

نوموړی زياته کړه: ((په ښار کې خپلسري وسله وال ګرځي، په دې ورځو کې جنايي قتلونه هم ډېر کېږي، خلک اندېښنه نه لري، امنيت د هر څه لپاره مهم دی.))

د هغه په وينا، دوی خوښ دي چې د جشن په ورځ د زرګونو خلکو کوربتوب کوي؛ خو وړانديز کوي چې بايد په دولتي کچه د جشن د امنيت ساتنې لپاره خلکو ته ډاډ ورکول شي.

خو د جشن د چمتووالي کمېسيون د امنيتي کمېټې مسوول ذبيح الله اختري پژواک ته وويل، چې سږکال يې د تېرو کلونو په پرتله سخت امنيتي تدابير پلان کړي دي.

نوموړي زياته کړه، د تېرو کلونو په څېر د ښار شاوخوا د پنځو نويو امنيتي کمربندونو جوړېدو سربېره د جشن د امنيت نيولو لپاره امنيتي ګارنيزيون جوړ کړی دی.

د هغه په خبره، په دغه ګارنيزيون کې د امنيتي چارواکو سربېره د ځينو ګوندونو، سياسي جريانونو او ځينو هغو اړخونو ته چې وسلې لري، غړو ته هم د ګډون بلنه ورکړل شوې ده.

اختري وويل: ((کلک تصميم نيول شوی چې په ښار کې د غيرقانوني وسلو لرونکو خلک ته د ګرځېدو اجازه نه ورکول کېږي.))

نوموړي زياته کړه، سږ کال به د نورو کلونو په پرتله هوايي ځواک هم د جشن په امنيت نيولو کې ملتيا کوي.

هر كال د روضې د جنډې پورته کول په ځانګړو مراسمو ترسره كېږي چې د هېواد ځينې لوړ پوړي چارواكي هم په كې برخه اخلي.

د بلخ ولايت مقام مطبوعاتي مسوول منير فرهاد وويل چې په مزارشريف كې د تېر كال د نوروز جشن كې د ولسمشر دويم مرستيال سرور دانش په ګډون يو لړ لوړپوړو دولتي چارواكو او په دغه ښار كې د بهرنيو هېوادونو قونسلرانو هم برخه اخيستې وه.

خو زياته يې كړه، تر اوسه څرګنده نه ده چې د راتلونكي كال په دې مراسمو كې به كوم لوړپوړى چارواكى برخه واخلي.

غړي

You need to subscribe to view the full article. Please login or register a new account.

اړوند خبرونه

ټول امنیت او جرمونه