کلات، محمود راقي (پژواک، ١١ مرغومى ٩٧) : چارواکي وايي چې د کاپيسا او زابل ولايتونو په بېلا بېلو عملياتو او نښتو کې وسله والو طالبانو او پوليسو ته مرګ ژوبله اوښتې ده.
د زابل د ارغنداب ولسوالۍ ولسوال اميرجان الکوزي د مرغومي په ١١مه، پژواک خبري اژانس ته وويل چې تېره شپه وسله والو طالبانو د سرخسنګ په سيمه کې د ملي اردو او پوليسو پر پوستو بریدونه کړي وو.
هغه زياته کړه، په دې نښتو کې اووه پوليس، پنځه وسله وال طالبان وژل شوي، دوه پوليس او شپږ وسله وال ټپيان شوي دي.
دى وايي، وسله والو طالبانو د امنيتي ځواکونو يو ټانک هم له ځانه سره بيولى دى.
بلخوا د کاپيسا ولايت مسوولين وايي چې د عملياتو پر مهال ١١ وسله والو طالبانو ته مرګ ژوبله اوښتې ده.
ددې ولايت د نجراب ولسوالۍ د سيمه ييزو پولیسو قوماندان عبدالصبور ساپي پژواک ته وويل، چې په دې عملياتو کې د قاري شمس او قاري احمدي په ګډون شپږ وسله وال طالبان وژل شوي او پنځه نور يې ټپيان شوي دي.
هغه وايي، چې پنځه کلي يې له وسله والو پاک کړي دي.
د نوموړي په وینا، په دې عملیاتو کې سيمه ييز پولیس، ملي پولیس، ملي اردو او د ولسي پاڅون کوونکي برخه لري.
وسله والو طالبانو بيا ويلي چې په نجراب کې يې د يوه قوماندان په ګډون درې دولتي سرتېري وژلي دي.
login or register a new account.
