فیض اباد (پژواک، ۱۸غبرګولی ۱۴۰۰): د بدخشان سلګونو اوسېدونکو چې نن یې د ناامنیو د زیاتوالي او د اوبو د کموالي له امله په لاریونونو لاس پورې کړ او د والي لرې کېدل یې غوښتل، د پولیسو له لوري پرې ډزې شوي چې درې کسان په کې وژل شوي او ۲۴ نور ټپيان شوي دي.
د بدخشان دغو اوسېدونکو په داسې حال کې د ناامنیو پر زیاتوالي، د شورابک بند برق نه پرانیسته او د پاکو اوبو نه شتون له امله لاریون وکړ او داسې شعارونه یې ورکول: «مرګ پر والي» او پولیس یې پر ډبرو وویشتل.
۲۸ کلن فتح الله یو له معترضینو څخه دی چې پر سر ټپي شوی، هغه پژواک خبري اژانس ته وویل چې معترضینو خپل اعتراضات د نوي ښار د بزکشۍ له میدان څخه پيل کړل او د ولایت تر مقام پورې يې ادامه ورکړه، خو د مقام دروازې ته نږدې امنیتي ځواکونو یې مخنیوی وکړ او پر دوی یې ډزې وکړې.
نوموړی چې د پولیسو له لوري د اچول شوي لاسي بم په پایله کې ټپي شوی، زیاته کړه چې تر هغه وخته به خپلو اعتراضونو ته دوام ورکوي تر څو د بدخشان والي له مقام څخه لرې شوی نه وي.
یوه بل معترض ذکرالله وویل چې حکومتي ځواکونو د بدخشان والي په امر پر عامو خلکو ډزې کړې دي.
د هغه په وینا، حکومتي ځواکونو د معترضینو په وړاندې د مرمیو پر ډزو او د ډبرو په وارولو ګڼ شمېر معترضین ټپيان کړي دي.
فیض اباد ښار کې د استاد رباني مرکزي روغتون سرطبیب شفیق الله همدرد پژواک ته وویل چې تراوسه د معترضینو درې مړي او ۲۴ ټپيان روغتون ته لېږدول شوي دي.
د نوموړي په خبره، د ځینو روغتیایي حالت نازک ښودل شوی دی.
د بدخشان د والي ویاند نېک محمد نظري وویل چې معترضینو ځینو نظامي تاسیساتو او دولتي ادارو ته اور اچولی و چې د ډبرو وارولو په پایله کې یو شمېر امنیتي ځواکونه ټپيان شوي دي.
ده زیاته کړه، د دولتي ځواکونو هوایي ډزې د والي په امر نه وې، یواځې دغو نظامیانو غوښتل چې په هوایي ډزو معترضین د حکومتي تاسیساتو له ویجاړۍ څخه منع کړي.
له فیض اباد ښار څخه د پژواک خبریال خبر ورکوي چې تراوسه هم د خلکو اعتراضونه د ولایت مقام ته نږدې روان دي. .
متعرضین وایي چې د تحصن خېمو په درولو سره د دغه ولایت د والي لرې کېدل غواړي.
