د فاریاب ولایت ګرزیوان او قرغان ولسوالۍ طالبان نیولې دي

میمنه(پژواک، ۳ چنګاښ ۱۴۰۰): د فاریاب سیمه ییزې سرچینې د طالبانو له خوا د دغه ولایت د ګرزیوان او قرغان ولسوالیو د سقوط خبر ورکوي او وايي چې پر بلڅراغ، قرمقول او اندخوی ولسوالیو سخته جګړه روانه ده.

د ولایتي شورا غړي فضل الحق محمدي پژواک ته وویل چې ګرزیوان ولسوالۍ د طالبانو له خوا تر څلورو کلونو کلابندۍ او حکومت د نه پاملرنې له امله تېره شپه سقوط شوې ده.

محمدي زیاته کړه: ((ګرزیوان ولسوالۍ کې د ولسي پاڅونوالو په ګډون د بېلا بېلو امنیتي قطعو ۳۰۰ منسوبین د سلګونو طالبانو له خوا کلابند وو، اوبه او ډوډۍ یې بند شوي وو، هر څومره فریاد یې چې وکړ او مرسته یې وغوښتله حکومت ورته توجه ونه کړه، مجبور شول چې تېره شپه طالبانو ته تسلیم شي.))

هغه وویل، د ولسوال په ګډون یې شاوخوا ۶۸ ولسي پاڅون کوونکي په شخصي موټرو کې تر میمنې ښاره ورسول، د اردو، پولیسو او ملي امنیت سرتېرو ته یې پنځه ــ پنځه زره نغدې پیسې ورکړې او ورته ویلي یې دي چې کورونو ته ستانه شئ.

د ګرزیوان ولسوال ملا فیض الله رحماني پر خپله فېسبوک پاڼه لیکلي چې په ګرزیوان ولسوالۍ کې تر ۳۰۰ ډېر امنیتي منسوبین کلابند وو، اوبه او خواړه یې نه لرل، ارتباطي شبکې قطعه وې، خو حکومت یې غږ وانه ورېد. وروسته طالبانو ونیوله خپله له څو کسانو سره د ځمکې له لارې نن سهار وختي درې بجې میمنې ښار ته رسېدلی دی.

تېره شپه د ۲۰۹ شاهین قول اردو رییس ارکان ډګروال سید یاسین سداد ګرزیوان ولسوالۍ کې د امنیتي سرتېرو د کلابندۍ اړوند پژواک ته ویلي و، د شپې یې میمنې ښار ته د الوتکو په وسیله لېږدوي په داسې حال کې چې د شپې اته بجې دې ولسوالۍ سقوط کړی و.

دغه راز د ولایتي شورا غړي غني فضل الحق محمد د قرغان ولسوالۍ د سقوط خبر ورکړ او ویې ویل، په قرمقول او بلڅراغ ولسوالیو کې سخته جګړه روانه د. همدا اوس سلګونه طالبان د حشر په ډول پر بلڅراغ ولسوالۍ فشار راوړی او له خپل لوري یې سپین ږیري لېږلي، امنیتي سرتېرو ته یې ویلي چې باید له جګړې پرته تسلیم شي.

بلڅراغ ولسوالۍ کې یوې امنیتي سرچینې پژواک ته وویل چې نن سهار اته بجې امنیتي سرتېرو بلڅراغ کې سپین ږیري بللي او غواړي د تسلیمېدو اړوند ترې مرسته وغواړي.

په ورته وخت کې د اندخوی ولسوال سلطان محمد سنجر وویل، له بېلا بېلو ولسوالیو څخه سلګونو راغلو طالبانو تېر ماښام پر قرمقول، قرغان او اندخوی ولسوالیو بریدونه پیل کړي دي. قرغان ولسوالۍ د امنیې قوماندانۍ له نوې ودانۍ پرته او د اندخوی ولسوالۍ «ده یکچي خانه» کلی طالبانو نیولي دي.

نوموړي په ډاګه کړه چې په نښتو کې د امنیتي ځواکونو یو ټانک ویجاړ شوی او اوس مهال «سهار ۸:۳۰ بجې» په قرمقول ولسوالۍ کې جګړه روانه ده.

خو طالبانو د یادې ولسوالۍ د نیولو په اړه څه نه دي ویلي.

د یادونې ده چې له تېرو دوو میاشتو راهیسې ۸۰ ولسوالۍ طالبانو نیولې دي.

خو د ملي دفاع وزارت ویاند روح الله احمدزی وايي چې امنیتي او دفاعي ځواکونو په ځينو ولسوالیو کې تکتیکي شاتګ کړی دی.