ګردېز (پژواک، ۲۰ زمری ۱۴۰۰): د ٢٠٣ تندر قول قوماندان وايي چې د افغانستان په جګړه کې د سيمې او نړۍ استخبارات دخيل دي او له طالبانو سره په جګړه کې ګاونډي هېوادونه پوره همکاري کوي.
د سوېل ختيځ زون د ۲۰۳ تندر قول اردو قوماندان تورنجنرال دادان لونګ وايي په پکتيا او شاوخوا ولايتونو کې د وسله والو طالبانو د جګړې مشري په مستقيم ډول د پاکستان پوځ او استخبارات کوي.
لونګ دا خبرې له خلکو سره د يوې غونډې په ترڅ کې وکړې او ويې ويل چې له وسله والو طالبانو سره په دې چاره کې د ایران نظامي استخباراتي اداره (سپاه پاسداران) هم همکاري کوي.
نوموړي زياته کړه، چې يادې ډلې د بهرنيو وسله والو په همکاري د ګردېز د سقوط زياتې هڅې وکړې، خو په خبره يې ياد پلان يې ورشنډ کړی دی.
د قول اردو قوماندان وايي، چې وړمه ورځ يې د پکتيا لپاره د وسله والو طالبانو نظامي مسوول چې په خبره يې د پاکستان د کوهاټ سيمې او پاکستانی ډګروال و، وژلی دی.
جنرال لونګ وايي: "دا جګړه بهرنۍ ده، په دې کې د سيمې او نړۍ استخبارات، په خاص ډول زموږ د ګاونډيو هېوادونو او بيا د پاکستان استخبارات دي. زموږ يو څه ناپوهان يې رامخې ته کړي، نور ټول هغوی لګيا دي. که هر څوک جګړې ته راشي، بېرته به روغ ولاړ نه شي."
د تندر قول اردو قوماندان پژواک ته وويل چې د وسله والو طالبانو جنګي ماشين ويجاړ شوی او ژر به د جګړې کولو توان له لاسه ورکړي.
لونګ زياته کړه، چې نړيواله ټولنه او بانفوذه هېوادونه بايد د افغانستان او سيمې د ثبات لپاره د ترورېزم د ملاتړو پر وړاندې جدي ګامونه واخلي.
لونګ ټينګار وکړ، چې پرېښودل شوې يا سقوط شوې سيمې به هم بېرته ونيسي.
د غونډې ګډونوالو د وروستي امنيتي حالت او د وسله والو طالبانو له خوا د ځينو سيمو د تخليه يا نيولو د ادعاګانو په اړه پوښتنې وکړې او له مسوولينو يې د جدي اقداماتو غوښتنه وکړه.
دوی په سقوط شويو ولسواليو کې د خلکو د ناوړه ژوند په اړه اندېښنه وښوده او ويې ويل چې د وسله والو طالبانو د جګړې او زيانونو له امله لا هم ګڼ شمېر خلک د بې ځايه کېدو په حال کې دي.
د دوی له ډلې حاجي اسلام الدين منګل وويل: "دا ډول غونډې ډېرې موثرې دي، رښتيا خبره دا ده چې د خرابو تبليغاتو له امله د خلکو روحيه کمزورې شوې وه، خو دا ډول ناستې او مهم معلومات خلکو ته مورال ورکوي."
مدني فعال احسان الله حليم وويل، چې خلک په بېساري ډول د امنيتي ځواکونو ملاتړي دي او ټينګار کوي چې نړيواله ټولنه بايد د هېواد د حالاتو د ژر سمون لپاره بېړنی اقدام وکړي.
بل لورته وسله والو طالبانو د يادو څرګندونو په اړه تر اوسه څه نه دي ويلي، خو تر دې وړاندې د دغې ډلې وياند ذبيح الله مجاهد پژواک ته ويلي و چې د دوى په ليکو کې هیڅ بهرنيان نشته دي.
د يادونې ده چې له تېرو دوو مياشتو راهيسې په ټول هېواد کې جګړو زور اخسيتى چې په ترڅ کې يې طالبانو د لسګونو ولسواليو ترڅنګ د نهو ولايتونو مرکزونه هم نيولي دي.
