کابل (پژواک، ۲۲ لړم ۱۴۰۰): د روغتیا نړیوال سازمان پر شري ناروغۍ د زرګونه افغان ماشومانو د اخته کېدو له امله اندېښنه څرګنده کړې ده.
د روغتیا نړیوال سازمان ویاند مارګریت هریس د لړم په ۲۱مه د سویس په ژنیو ښار کې په یوه ویډیویي کنفرانس کې له خبریالانو سره په دې اړه خبرې وکړې.
نوموړی د شري ناروغۍ خپرېدل د اندېښنې وړ ګڼي؛ ځکه په یاد هېواد کې د اقتصادي وضعیت خرابېدو او خوارځواکۍ د ډېرېدو له امله پر شري ناروغۍ د اخته کسانو د مړینې کچې د ډېرېدو احتمال ډېر دی.
هغه پر دې ناروغۍ د اخته ماشومانو پر معاینې او نظارت ټينګار کړی دی.
مخکې له دې د یاد سازمان ویاند ویلي وو چې درې میلیونه افغان ماشومان پر ځوارځواکۍ اخته دي چې تر یو میلیون د ډېرو وضعیت نازک دی او د مړینې احتمال یې شته.
شری (Measles) څه ډول ناروغي ده او نښې یې څه دي؟
شری یوه ویروسي ساري ناروغي ده چې تر ډېره د ماشومان د مړیني لامل کېږی او د واکسین په تطبیق سره یې له مړینې مخنیوی کېږي.
د شري د ډېری ناروغانو د مړینې لامل د همدغې ناروغۍ اختلاطات لکه کوری، د دماغ التهاب یا پړسوب، شدید اسهال او د اوبو کمښت، د غوږونو مکروبي کېدل او سینه بغل دي.
د شري ناروغۍ نښې نښانې څه دي؟
د شري لومړۍ نښه د لوړې تبې لرل دي خو پر وجود دانې، ټوخی، زوکام، کانګې او د سترګو سوروالی هم د یادې ناروغۍ نښې نښانې دي.
Views: 42
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن