<p style="text-align: justify;">غزني ښار (پژواک، ۶ مرغومی ۱۴۰۳): د غزني بدني روزنې او ورزش امریت وایي، د دغه ولایت په مرکز کې د ۲۸ لوبډلو ترمنځ د فوټسال ژمنۍ سيالۍ پیل شوې.</p>
<p style="text-align: justify;">د غزني ورزش امر بلال مجاهد پژواک خبري اژانس ته وویل، یادې سیالۍ د غزني فوټسال فدارسیون له لوري د ورزشي آمريت په همکارۍ په ولیعصر جمنازيوم کې پيل شوې.</p>
<p style="text-align: justify;">نوموړي وویل، دا سیالۍ به یوه میاشت دوام وکړي چې په لومړۍ لوبه کې د «مولاعلي» او «اتحاد جرغي برجګي» لوبډلو له يو بل سره سيالي وکړه چې په ترڅ کې مولاعلي لوبډلي خپلې سیالې لوبډلې ته پنځه د صفر پر وړاندې ماتې ورکړه.</p>
<p style="text-align: justify;">هغه زیاته کړه، د دغو سیالیو د ترسره کولو موخې د ورزشکارانو ترمنځ یووالی، مینه، پیوستون او تفریح رامنځته کول او پر نشهیي توکو د ځوانانو د اخته کېدو مخنیوی او همداراز ورزش ته د ځوانانو هڅول دي.</p>
<p style="text-align: justify;">دغه راز، د یادو سیالیو یوه لوبغاړي مزمل پژواک ته وویل، دا ډول سیالۍ کولای شي چې د فوټسال لوبغاړو ترمنځ پياوړي اړیکي رامنځته کړي.</p>
<p style="text-align: justify;">نوموړي وویل، د فوټسال فدارسیون ته په کار ده چې دغه ولایت کې لوبغاړو ته زیاتي اسانتیاوې برابرې کړي.</p>
<p style="text-align: justify;">دا په داسې حال کې ده چې شاوخوا درې اونې مخکې هم په غزني کې د ۲۰ لوبډلو ترمنځ د فوټسال سیالۍ پیل شوې وې.</p>
