جلال‌اباد ښار کې د يوې رغنیزې پروژې چارې پيل شوې

جلال‌اباد (پژواک، ۶ مرغومی ۱۴۰۳): د ننګرهار ولايت په مرکز جلال‌اباد ښار کې د ۱۸ ميليونه افغانيو په لګښت د يوې رغنیزې پروژې چارې پيل شوې.

مسوولین وايي، په دغه پروژه کې د سړک، ویالو او پلچکونو د کانکرېټ کول شامل دي چې لګښت يې د ښاروالۍ له داخلي عوایدو ورکول کېږي.

د جلال‌اباد ښاروالۍ وياند حامد محمودي د مرغومي په ۶مه پژواک خبري اژانس ته وويل، د ښاروالۍ له داخلي عوایدو د نهمې ناحیې په ۱۲ ګذر کې د ۱۸ میلیونو افغانیو په لګښت د سړک، ویالو او پلچکونو د کانکریټ کولو پروژه پیل شوه.

دی وايي، یاد سړک چې ۱۱۰۰ متره اوږدوالی او ۷ متره پلنوالی لري، په کې ۷ پلچکونه، ۵۸۰ متره ویالې او ۱۳۶۰ متره د سړک غاړې سنکاري شامل دي.

د هغه په وينا، د دې پروژې کارونه به په راتلونکي څلورو میاشتو کې بشپړ او ګټې اخیستنې ته وسپارل شي.

د سیمې اوسېدونکو د دې پروژې پر پیل خوښي ښيي او د نورو پرمختیايي پروژو غوښتنه کوي.

د سيمې يوه اوسېدونکي غلام‌رحمان پژواک اژانس ته وويل چې دا پروژه د سیمې د خلکو لپاره ځکه حیاتي ده چې د ورښتونو پرمهال به خلکو ته ډېرې ستونزې جوړېدې.

ښاروالۍ تر دې وړاندې هم د جلال‌اباد ښار په بېلابېلو سيمو کې ورته پروژې پلې کړي او وايي، هڅه کوي چې د جلال‌اباد ښار ټول فرعي سړکونه په اساسي بڼه ورغوي.