<p style="text-align: justify;">پلعلم (پژواک، ۶ مرغومی ۱۴۰۳): د لوګر ولایت د بدنې روزنې او ورزش امریت وایي، د سوکوهنې عمومي فدراسیون له لوري په مرکز پلعلم کې د ۵۰ غوره لوبغاړو ترمنځ د سوکوهنې یو ورځنۍ سیالۍ ترسره شوې.</p>
<p style="text-align: justify;">د دغه ولایت د بدني روزنې او ورزش امر انجنیر مزمل نعیمزي پژواک خبري اژانس ته وویل، د سوکوهنې عمومي فدراسیون له لوري د ولایت په کچه د څلورو کلبونو او ۵۰ غوره لوبغاړو ترمنځ د سوکوهنې یو ورځنۍ سیالۍ جوړې شوې.</p>
<p style="text-align: justify;">نوموړي زیاته کړه چې دغه سیالۍ یې د ولایت په کچه د سوکوهنې سیالیو ته د ودې ورکولو، د ورزشکارانو ترمنځ د تجربو شریکولو او همدارنګه د سوکوهنې ملي لوبډلې ته د ورزشکارانو د په نښه کولو په موخه جوړ کړې دي.</p>
<p style="text-align: justify;">دغه راز، د یادو سیالیو یوه لوبغاړي احمدخالد پژواک ته وویل، خوښ دی چې د ژمي د سوکوهنې سیالویو کې يې ګډون وکړ.</p>
<p style="text-align: justify;">نوموړي زیاته کړه، په دغو سیالیو کې د ولایت په کچه له بېلابېلو کلبونو لسګونو لوبغاړو او سلګونو نندارچیانو ګډون کړی و.</p>
<p style="text-align: justify;">د یادونې ده، څو ورځې مخکې د لوګر د بدني روزنې او ورزش امریت له لوري د ولایت په کچه د ۳۳ لوبډلو ترمنځ د «خزان جام» په نوم د والیبال سیالۍ جوړې شوې وې.</p>
