جلال اباد (پژواک، ۸ مرغومی ۱۴۰۰): په ننګرهار کې د تل پسرلي شرکت له لوري د ۱۵ ميليونه ډالرو په لګښت د چرګانو د دانې د توليد فابريکه جوړه شوه چې په ٢٤ ساعتونو کې به ١٢ ټنه دانه توليدوي.
د فابريکې مسوولين وايي چې د دغې فابريکې توليدات به د هېواد له بېلابېلو ولايتونو سربېره تاجکستان او قزاقستان هېوادونو ته هم صادريږي.
د يادې صنعتي فابريکې پرانېسته د ننګرهار د والي او په دغه ولايت کې د سوداګرۍ او پانګونې خونې د رييس له لوري وشوه.
د يادې فابريکې يو مسوول سيد جاوېد وايي چې دغه فابريکه د تل پسرلي کرنيز شرکت له لوري د ننګرهار په شيخ مصري صنعتي ښارګوټي کې د ۱۵ ميليونه ډالرو په لګښت جوړه شوې ده.
دی وايي، د دغې فابريکې په دواړو برخو ١٥ ميليونه امريکايي ډالر لګښت راغلی، چې په کې پنځه سوه کسان په کار بوخت دي او په ٢٤ ساعتونو کې د ١٢ ټنه دانې د توليد ظرفيت لري.
د هغه په وينا، د دغې فابريکې توليدت به د نورو ولايتونو ترڅنګ تاجکستان او قزاقستان هېوادونو ته هم صادريږي.
د ننګرهار والي مولوي محمد داوود مزمل د يادې فابريکې پر پرانیستلو خوښي وښوده او په هېواد کې يې سوداګري او خلکو ته د کاروبار او توليداتو زمينې برابرول خير او ستر کار ياد کړ.
نوموړي سوداګرو او پانګوالو ته د ملاتړ، امنيت خونديتوب، د سهولتونو رامنځته کولو او ستونزو حل کې د همکارۍ او همغږۍ ډاډ ورکړ.
په ننګرهار کې د سوداګرۍ خونې رييس ګلمراد عرب د صنعتي پارک د سړک جوړولو، برېښنا، امنيت، سوداګريزو اسانتياوو او صنعت ته د پراختيا ورکولو په برخو کې وړانديزونه وکړل چې د ننګرهار والي د حل ډاډ ورکړ.
تل پسرلی شرکت ورته يوه بله فابريکه هم لري چې توليدات يې د نورو ولايتونو ترڅنګ تاجکستان او قزاقستان هېوادونو ته هم صادريږي.
Visits: 564
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن