کابل (پژواک، ۴ وری ۱۴۰۱) : شمالي کوریا د نړیوالو له اعتراضونو سره سره، د لویو وچو ترمنځ واټن وهونکی توغندی ازمویلی دی.
امریکایي رسنیو خبر ورکړ، د شمالي کوریا له خوا د دې نوي راکټ تر ازموینې وروسته، په ګاونډ کې یې سویلي کوریا هم نامعلوم لوري ته پنځه توغندي توغولي او خپل کلک غبرګون یې ښودلی دی.
بل خوا د جاپان دفاع وزارت ویلي، د شمالي کوریا له خوا د لویو وچو ترمنځ واټن وهونکی توغول شوی راکټ شاوخوا ۷۰ دقیقې په فضا کې و او د جاپان له ساحل څخه ۱۷۰ کیلومترۍ واټن کې پریوتی دی.
سرچینې زیاته کړې، دغه راکټ تر شپږ زره کیلومتره پورې هدف ویشتلی شي.
امریکا هم د شمالي کوریا دغه کار غندلی او زیاته کړې چې په دې سره سیمه کې تاوتریخوالی زیاتېږي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن