<p style="text-align: justify;">کابل (پژواک، ۸ وری ۱۴۰۱): د استخباراتو ریاست وايي، امنيتي ځواکونو د وردګ ولایت د بهسود ولسوالۍ اړوندو سیمو کې د عبدالغني عليپور ۵۰ میله وسلې تر لاسه کړي دي.</p>
<p style="text-align: justify;">د استخباراتو ریاست پر خپل ټويټر ليکلي، په دغو وسلو کې ۴۶ میله کلاشینکوفونه، یو راکټ، یو میل پیکا، یوه تومانچه او یو میل سل ډزی شامل دي.</p>
<p style="text-align: justify;">عبدالغني عليپور چې مخکې د نامسوولو وسله والو په لرلو، په لارو کې د باج اخیستو او د خلکو پر ځورولو تورن و، د ۱۳۹۷ لمریز کال د لېندۍ په څلورمه<strong> <a href="https://bit.ly/35amTtZ">امنیتي ځواکونو په کابل کې ونیو</a></strong>؛ خو وروسته د مخکیني ولسمشر دویم مرستیال سرور دانش په ضمانت خوشی شو. نوموړي هغه مهال ژمنه وکړه چې <strong><a href="https://bit.ly/3h4Ahlm">وسلې به يې ثبتوي</a></strong> او دولت ته به سپاري.</p>
<p style="text-align: justify;">خو د<strong> <a href="https://www.bbc.com/pashto/afghanistan-56464232">راپورونو</a></strong> له مخې، د هغه وسله والو د تېر کال د کب میاشتې په ۲۹مه د وردګ ولایت په بهسود ولسوالۍ کې د ملي دفاع وزارت یوه چورلکه وغورځوله.</p>
<p style="text-align: justify;">دا مهال څرګنده نه ده چې علیپور چېرته دی.</p>
<p style="text-align: justify;">د يادونې وړ ده چې د تېر کال د مرغومي په ۲۷مه هم امنیتي ځواکونو د وردګ ولایت په بهسود ولسوالۍ کې د عليپور د وسلو او مهماتو د دوو پټنځایونو د موندلو خبر ورکړی و.</p>
