بغلان کې «د خټکي ګل» په نوم مشاعره وشوه

<p style="text-align: justify;">پلخمري (پژواک، ۱۰ غبرګولی ۱۴۰۱): د بغلان ولایت د اطلاعات او فرهنګ ریاست له لورې د دغه ولایت په مرکز پلخمري کې د خټکي ګل تر سرلیک لاندې لومړنۍ مشاعره وشوه.</p>

<p style="text-align: justify;">دا مشاعره په بغلان پوهنتون کې جوړه شوې وه چې د لسګونو شاعرانو تر څنګ په کې د پوهنتون استادانو او سلګونو محصلینو ګډون کړی وو.</p>

<p style="text-align: justify;">د مشاعرې لومړۍ برخه ویناوو او دویمه هغه یې مشاعرې ته ځانګړې شوې وه.</p>

<p style="text-align: justify;">د بغلان د اطلاعاتو او فرهنګ رییس مولوي مصطفی هاشمي په خپله وینا کې وویل، دا ډول غونډې د ځوانانو تر منځ یووالی راولي او له خپل رښتیني کلتور څخه یې خبروي.</p>

<p style="text-align: justify;">هغه زیاته کړه، هوډ لري په دغه ولایت کې د چونغر، کرکر او نورو لرغونو ځایونو په نومونو ورته مشاعرې او ادبي ناستې جوړې کړي.</p>

<p style="text-align: justify;">د بغلان پوهنتون رییس ګل رحمن رحماني هم په خپله وینا کې د ادبي ناستو پر ارزښت خبرې وکړې او ویې ویل چې دا ډول فرهنګي غونډې د ځوانانو په ځانګړې توګه د محصلینو د فکري ودې او له ادبیاتو سره د اشنايي لامل کېږي.</p>

<p style="text-align: justify;">ورپسې ازاده مشاعره پیل شوه چې شاعرانو په کې په پښتو، دري او ازبیکي ژبو خپل شعرونه واورول چې هېوادپالنې، ازادۍ، مینې او ورورولۍ ته لیکل شوي وو.</p>

<p style="text-align: justify;">د اوسني سرپرست حکومت له راتلو وروسته دا دویمه مشاعره ده چې د اطلاعاتو او فرهنګ ریاست له خوا په بغلان کې جوړېږي.</p>

<p style="text-align: justify;">پنځه میاشتې مخکې په دغه ولایت کې لومړۍ مشاعره د ازادۍ تر سرلیک لاندې جوړه شوې وه.</p>