<p style="text-align: justify;">میدانښار(پژواک، ۱۳ وری ۱۴۰۲): د میدان وردګو په سیداباد ولسوالۍ کې پرون د راکټ زړې مرمۍ چاودنې له امله د یوې کورنۍ دوه ماشومان وژل شوي دي.</p>
<p style="text-align: justify;">د یاد ولایت امنیې قوماندانۍ پژواک خبري اژانس ته په رالېږلې خبرپاڼه کې ويلي، دغه پېښه پرون له غرمې وروسته د سیداباد ولسوالۍ په تنګي دره کې شوې چې له امله يې دوه ماشومان -چې خور او ورور وو- وژل شوي دي.</p>
<p style="text-align: justify;">سرچينې ويلي، یادو ماشومانو د راکټ زړه مرمۍ پيدا کړې وه او د لوبو پر مهال پرې چاودلې ده.</p>
<p style="text-align: justify;">د یادونې ده، د هېواد په ډېرو سیمو کې له تېرو جګړو څخه ناچاوده توکي پاتې چې وخت ناوخته یي چاودنې خلکو او په تېره بیا ماشومانو ته مرګژوبله اړوي.</p>
<p style="text-align: justify;">د تېر لمریز کال د سلواغې په ۳مه، د میدان وردګو د عامې روغتیا رییس محمدزرک ځيرک پژواک خبري اژانس ته ویلي و چې له جګړو څخه پاتې ناچاوده توکو چاودنو له امله یوازې په تېر کال کې ۳۰ کسان وژل شوي دي.</p>
