اروزګان کې د نشه‌يي توکو درې کارخونې له منځه وړل شوې دي

ترینکوټ (پژواک، ۱۴ وږی ۱۴۰۲): اروزګان کې مسوولین وايي چې امنیتي ځواکونو د دغه ولایت په چارچینو او ګيزاب ولسوالیو کې د نشه‌یې توکو د تولید درې کارخونې له کشف وروسته له منځه وړې دي.

د اروزګان د اطلاعاتو او فرهنګ رییس قاري اغاولي قریشي پژواک خبري اژانس ته وویل، امنیتي ځواکونو تېره شپه د ګيزاب ولسوالۍ په خلج سیمه کې د نشه‌يي توکو د تولید یوه کارخونه کشف او له منځه وړې ده.

هغه دغه راز زیاتوي چې په دغو کارخونو کې زرګونه کیلوګرامه ومان او له ومانو جوړ نشه‌يي توکي هم ترلاسه او له منځه وړل شوي دي.

نوموړي زیاته کړه چې له یادې کارخونې سره په تړاو يې دوه کسان هم نیولي چې د څېړنو لپاره عدلي او قضايي ادارو ته ور وپېژندل شول.

دغه راز قریشي وویل چې نن سهار د اروزګان د چارچینو ولسوالۍ په کیشي او تګاب سیمو کې هم د نشه‌يي توکو د تولید دوه کارخونې کشف او له منځه وړل شوې دي.

هغه زیاته کړه چې په دې کارخونو کې هم یوه اندازه نشه‌يي توکي ترلاسه او له منځه وړل شوي دي.

د یادونې ده، په هېواد کې د هر ډول نشه‌يي توکو پر کارولو، کرکیله، پېر او پلور بندیز لګېدلی او سرغړونکي مجرمین ګڼل کېږي.