ژبه

ایا له پژواک سره د ګډون حساب نه لرئ؟

د ګډون لپاره کښېکاږئ.

هرات کې ټول شوي لسګونه ماشومان او سوالګر له فني او حرفوي زده‌کړو فارغ شول

هرات کې ټول شوي لسګونه ماشومان او سوالګر له فني او حرفوي زده‌کړو فارغ شول

author avatar
24 Sep 2023 - 16:21
هرات کې ټول شوي لسګونه ماشومان او سوالګر له فني او حرفوي زده‌کړو فارغ شول
author avatar
24 Sep 2023 - 16:21

هرات (پژواک، ۲ تله ۱۴۰۲): د هرات د کار او ټولنیزو چارو ریاست مسوولین وایي، ۳۵۰ کسان چې ډېر یې د واټونو د سر کارګر ماشومان او ټول شوي سوالګر دي، په دغه ولایت کې د فني او حرفوي زده‌کړو له دورې فارغ شول.

د مسوولینو په خبره، دغو کسانو د کار او ټولنیزو چارو ریاست په مدیریت او د جرمني د هلپ موسسې په مالي ملاتړ د انصاري، غوریان، ادرسکن او زاول روزنیزو مرکزونو کې له فني او حرفوي شپږ میاشتنۍ زده‌کړو وروسته د فراغت سندونه ترلاسه کړل.

د هرات د کار او ټولنیزو چارو رییس حافظ میرزامحمد په دغه ولایت کې د فني او حرفوي زده‌کړو برخه کې د موسسو د مرستو هرکلي ترڅنګ پژواک ته وویل، د دې دورې ډېر فارغین هغه کارګر ماشومان او سوالګر دي چې د دغه ریاست له لوري سروې او راټول شوي دي.

هغه زیاته کړه، دا اداره هڅه کوي څو د واټونو د سر کارګر ماشومان او مستحق سوالګر وپېژني او له ښاره یې راټول او د همکارو موسسو په مرسته یې د فني او حرفوي زده‌کړو پروګرامونو کې شامل کړي.

د فاریاب اصلي اوسېدونکی، یو داخلي بېځایه شوی او له دغه مرکزه فارغ ۱۹ کلن ګل‌محمد پژواک ته وویل چې مخکې یې پلاستیکونه او بوتلونه ټولول خو اوس د برق له رشتې فارغ شو او له دې لارې کولی شي چې د خپلې کورنۍ نفقه برابره کړي.

د هغه په خبره، د انصار روزنیز مرکز کې د عملي کار په پيلېدو سره کولی شي څو نور زده‌کوونکي تر روزنې لاندې ونیسي.

په ورته وخت کې، هغه موسسه چې په دې برخه کې د یاد ولایت د کار او ټولنیزو چارو له ریاست سره کار کوي، له دغه پروګرامه پر لا ملاتړ ټینګار کوي.

د هلپ موسسې د دفتر سرپرست فریدون حمیدي د یادو زده‌کوونکو د فراغت مراسمو کې وویل چې دوی په هرات له دغه پروګرامه ملاتړ کوي.

هغه وویل، هر فارغ کس ته د وسایلو یوه بکسه چې وکولی شي راتلونکي کې کار وکړي، ورکول کېږي.

د مسوولینو د معلوماتو له مخې، په دې شپږ میاشتنۍ روزنیزه دوره کې چې د هرات د کار او ټولنیزو چارو ریاست په همکارۍ او د یونیسف او هلپ موسسو په ملاتړ پیل شوې وه، یاد شمېر کسانو ته په بېلابېلو برخو کې لکه د کورونو د وسایلو د ترمیم، برق، د موټرسایکل او ریکشو د ترمیم، پرمختللې نجارۍ، د خیاطي، فلزکارۍ او موبایل د ترمیم برخو کې روزنه ورکړل شوه.

Views: 15

اړیکه ونیسئ

د کیسې وړاندیز وکړئ

پژواک ستاسو د خبر له وړانديزونو خوښ دی؛ مهرباني وکړئ، دلته په کلېک کولو سره له موږ سره خپل نظر شریک کړئ

د پژواک اپلیکېشن

د وروستي تازه معلوماتو ترلاسه کولو لپاره په خپل ګرځنده موبایل کې زموږ اپلېکشن ډاونلوډ کړئ.