<p style="text-align: justify;">غزنيښار (پژواک، ۲۸ وږی ۱۴۰۳): د غزني ولایت د تخنیکي پوهنتون له بېلابېلو پوهنځيو جیولوژي، کانونو او الکټرومیخانیک څخه شاوخوا ۱۵۰ کسان فارغ شول.</p>
<p style="text-align: justify;">په دې فراغتغونډه کې د غزني تخنیکي پوهنتون رییس پوهنمل فدامحمد محمدي وویل، نن د دغه پوهنتون له اوو ډیپارټمنټونو څخه شاوخوا ۱۵۰ کسان فارغ شول.</p>
<p style="text-align: justify;">نوموړي وویل، یاد پوهنتون د افغانستان په کچه دویم تخنیکي پوهنتون دی چې په وینا یې، لوړو زدهکړو وزارت غواړي دغه پوهنتون ته نور هم پراختیا ورکړي.</p>
<p style="text-align: justify;">هغه د بېلګې په توګه وویل، د دغه پوهنتون لابراتوارونو ته نوي وسایل ورکړل شوي او په راتلونکي کال کې په یو نوی پوهنځی هم فعال شي.</p>
<p style="text-align: justify;">هغه وویل: «دغه نوي فارغان کېدای شي د لوړو زدهکړو وزارت له لوري د افغانستان په سطحه هغو ارګانونو سره د همکارانو په توګه معرفي شي چې د تخنیک برخه کې کارمندانو ته اړتیا لري.»</p>
<p style="text-align: justify;">ورته وخت کې نوي فارغ شوي کسان د کاري فرصتونو برابرېدو غوښتنه کوي.</p>
<p style="text-align: justify;">د فارغ شوو کسانو له ډلې د پروان ولایت اوسېدونکي حزبالله پژواک ته وویل: «په خپله څانګه کې به خپل هېواد او خلکو ته کار کوم، خو له چارواکو غوښتنه کوم چې محصلینو او هغه کسانو ته چې له پوهنتونو فارغېږي د کار زمینه برابره کړي، څو دغه کادري محصلین بهرنیو هېوادونو ته په قاچاقي لارو لاړ نه شي.»</p>
<p style="text-align: justify;">دغه راز، یوه بل نوي فارغ شوي کس احمد ویس پژواک ته وویل: «که څه هم خوښ یم چې فارغ شوم خو خپلې راتلونکې ته اندېښمن یم؛ ځکه ښايي ژوند مې دغسې بېبرخلیکه او بېدندې په کور کې تېر شي.»</p>
<p style="text-align: justify;">هغه ټینګار وکړ چې په حکومتي ادارو کې دې کارونه لوستو ځوانانو ته ورکړل شي څو چارې په سمه توګه پر مخ ولاړې شي.</p>
<p style="text-align: justify;">د یادونې ده، له دې مخکې هم د غزني له دغه تخنیکي پوهنتونه شپږ دورې کسان فارغ شوي دي.</p>
