<p style="text-align: justify;">کابل (پژواک، ۲۸ لړم ۱۴۰۳): د امریکا ولسمشر اوکراین ته اجازه ورکړې چې د روسیې پر وړاندې د امریکا اوږد واټن ويشتونکي توغندي وکاروي، خو د روسیې ولسمشر مخکې خبرداری ورکړی چې دا کار به په جګړه کې د امريکا او ناټو د نېغې ښکېلتيا په معنا وي او روسیه به یې په تړاو اړینې پرېکړې وکړي.</p>
<p style="text-align: justify;">امريکايي <strong><a href="https://www.cbsnews.com/news/biden-ukraine-us-weapons-russia-restriction/">سيبياېس نيوز</a></strong> وایي، تېره ورځ يو لوړ پوړي امریکايي چارواکي ورته ویلي چې د دغه هېواد ولسمشر جو بایډن اوکراین ته اجازه ورکړې چې د روسیې پر وړاندې د امریکا اوږد واټن ويشتونکي توغندي وکاروي.</p>
<p style="text-align: justify;">راپور کې راغلي چې دا پرېکړه د اوکراین او روسیې د جګړې په اړه د واشنګټن په پالیسي کې د پام وړ بدلون ښکارندويي کوي.</p>
<p style="text-align: justify;">سرچینه زیاتوي چې دا چاره به کییف ته اجازه ورکړي چې د اردو تاکتیکي توغندیو سیسټم یا (ATACMS) وکاروي، څو په روسیه کې دننه اهداف په نښه کړي.</p>
<p style="text-align: justify;">د راپور له مخې، دا اقدام په داسې حال کې کېږي چې د شمالي کوریا شاوخوا لس زره پوځیان د اوکراین شمالي پولې ته څېرمه کرسک سيمې ته استول شوي چې د روسیې له ځواکونو سره د سیمې په بېرته نیولو کې مرسته وکړي.</p>
<p style="text-align: justify;">خو د روسيې <strong><a href="https://tass.com/world/1873797">ټاس</a> </strong>خبري اژانس نن لیکلي چې د روسيې ولسمشر ولاديمير پوتين د روان کال د سپتمبر په ۱۲مه ویلي وو چې د اوکراين په جګړه کې د روسيې پر ضد د لوېديځ د اوږد واټن ويشتونکي توغنديو د کارولو احتمالي پرېکړه به جګړه کې د امريکا او ناټو د نورو هېوادونو د مستقيمې ښکېلتيا په معنا وي.</p>
<p style="text-align: justify;">پوتین خبرداری ورکړی و چې دا ګام به د جګړې ماهیت بدل کړي او روسیه به د هغه ګواښونو پر وړاندې چې ورسره مخ کېږي، پرېکړې وکړي.</p>
<p style="text-align: justify;">د ټاس د خبر له مخې، د وینزویلا ولسمشر نیکولاس مادورو د بایډن یادو څرګندونو ته په اشارې ویلي چې امریکا د «لیونتوب او غچ اخیستنې» پړاو ته ننوتې ده.</p>
