بلخ کې په یوه کور کې د راکټ ساتل شوو مرمیو چاودنو درې کورونه ویجاړ کړي

مزارشریف (پژواک، ۳ لېندۍ ۱۴۰۳): د بلخ امنیه قومانداني وایي، د دغه ولایت په چهاربولک ولسوالۍ کې په یوه کور کې د راکټ ساتل شوې ۲۲ مرمۍ چاودېدلې چې له امله یې درې کورونه ویجاړ شوي.

د بلخ د امنیې قوماندانۍ له خوا په خپره شوې یوه خبرپاڼه کې راغلي، پرون د دغه ولایت د چهاربولک ولسوالۍ د «بیست پیکال» کلي په یوه کور کې ګازډبې چاودنه کړې چې له امله یې هلته ساتل شوې د راکټ ۲۲ مرمۍ هم چاودېدلې دي.

خبرپاڼه زیاتوي چې دغه پېښه ځاني زیان نه لري خو درې کورونه په مکمل ډول ویجاړ شوي دي.