مالیزیا کې افغان سفیر د یوناما له مشرې سره لیدلي

کابل (پژواک، ۷ مرغومې ۱۴۰۳): مالیزیا کې افغان سفیر د ملګرو ملتونو د سیاسي استازولۍ (یوناما) له مشرې سره د دغه بنسټ له لارې له افغانستان سره د مالیزیا د همکاریو پر زیاتوالي خبرې کړې دي.

په مالیزیا کې د افغانستان سفارت پر خپله اېکس‌پاڼه لیکلي چې په دغه هېواد کې افغان سفیر  نقیب‌الله احمدي کوالالمپور کې د افغانستان لپاره د یوناما له مشرې روزا اتنبایوا سره مالیزیا کې وکتل.

سرچينې لیکلي، په دې لیدنه کې په افغانستان کې د یوناما پر فعالیتونو د بحث ترڅنګ د یوناما په وسیله له مالیزیا څخه افغانستان ته د مرستو د جذب او همکارۍ پر زیاتوالي خبرې وشوې.

یاد سفارت لیکلي، احمدي د افغانستان او مالیزیا په وروستیو تعاملاتو او نږدې اړیکو د خبرو ترڅنګ د دواړو هېوادونو ترمنځ د ګډې همکارۍ په فرصتونو خبرې وکړې.

افغان سفارت لیکلي، اتنبایوا ویلي چې مالیزیا ته یې د سفر موخه له مالیزیايي چارواکو سره د افغانستان په اړه خبرې دي او د مالیزیا له لومړي وزیر، بهرنیو او دیني چارو وزیرانو سره یې لیدلي دي او هیله یې څرګنده کړې چې راتلونکي کې د دغو دواړو هیوادونه اړېکې لا سره نږدې شي.