Language

Don't you have an account with Pajhwok Afghan News?

Click here to subscribe.

کابل کې د مسلکي زده‌کړو پراختیا او کاري فرصتونو برابرولو دویم کنفرانس جوړ شو

کابل (پژواک، ۱۷ مرغومی ۱۴۰۳): کابل کې د مسلکي زده‌کړو پراختیا او کاري فرصتونو برابرولو په موخه د تخنیکي او مسلکي زده‌کړو ادارې او د خصوصي سکټور ترمنځ د ستراتیژیکو همکاریو دویم کنفرانس جوړ شو.

د ستراتیژیکو همکاریو دویم کنفرانس کې چې نن (د غبرګولي ۱۷مه) په کابل کې ترسره شو، د حکومتي چارواکو ترڅنګ د بېلابېلو خصوصي ادارو استازو ګډون کړی و.

یاد کنفرانس ته د تخنیکي او مسلکي زده‌کړو ادارې تخنیکي او مسلکي مرستیال مولوي غلام‌سعید احساس وویل، د تخنیکي زده‌کړو له لارې نه یوازې د زده‌کوونکو مهارتونه لوړیږي، بلکې د هېواد په اقتصادي او ټولنیزه پراختیا کې هم مهم رول لوبوي.

دی وايي، د هېواد په کچه اوس مهال ۳۸۵ تخنیکي او مسلکي ښوونیز مرکزونه فعالیت کوي چې په کې زرګونه کسان په بېلابېلو برخو کې زده‌کړې کوي.

احساس زیاتوي: «موږ له خصوصي سکټور سره همغږي او همکاري کوو، څو نه یوازې د زده‌کوونکو مهارتونه لوړ شي، بلکې هغوی ته د بازار له اړتیاوو سره سم روزنیز پروګرامونه هم وړاندې شي.»

دی وايي چې د مسلکي زده‌کړو اداره د نورو وزارتونو او موسسو په همکارۍ د روزنیزو پروګرامونو له لارې د کاري چاپېریال لپاره ځوانان چمتو کوي او موخه یې د بېکارۍ کچې کمېدو او د کاري فرصتونو برابرولو لپاره یوه ګډه تګلاره جوړول دي.

د افغانستان د سوداګرۍ او پانګونې خونې مرستیال یونس مهمند یاد کنفرانس ته وویل چې خصوصي سکټور د تخنیکي او مسلکي زده‌کړو له ادارې سره همکار دی.

دی وايي، فغانستان یو ترانزیټي هېواد دی؛ د دې لپاره اړینه ده مسلکي موټرچلوونکي ولري او دوی چمتو دي چې د مسلکي موټرچلوونکو روزنې لپاره په ګډه یوه اکاډمي جوړه کړي.

د مسلکي زده‌کړو د پراختیا او کاري فرصتونو برابرولو دویم کنفرانس ته د افغانستان بانک استازي احسان‌الله منصور د مسلکي کسانو لپاره د کاري فرصتونو برابرولو په اړه خبرې وکړې.

هغه وویل، د افغانستان بانک له خوا د نوښتګرو کسانو لپاره د شرعي اصولو په رڼا کې کوچني پورونه ورکول کېږي څو مسلکي کسان خپل کاري چاپېریال رامنځته کړي.

هغه زیاته کړه، یاده اداره د فارغو کسانو لپاره د انټرشيپ پروګرامونه وړاندې کوي، څو هغوی د تجربو ترلاسه کولو ترڅنګ خپله تخصصي برخه کې عملاً فعالیت وکړي.

ورته مهال، د کانونو او پټرولیم وزارت استازي شیخ ضیاءالرحمن ایوبي بیا په خپلو خبرو کې د تخنیکي زده‌کړو پر اهمیت ټینګار وکړ ویې ویل: «موږ باید پر ځان تکیه وکړو او خپل مسلکي افراد وروزو.»

د هغه په خبره، دوی له تخنیکي ادارې سره د همکاریو لپاره لېوال دي، څو د کانونو برخه کې ماهر کاریګر وروزل شي.

د یادونې ده، د دغه کنفرانس په لومړۍ ورځ د تخنیکي او مسلکي زده‌کړو ادارې له افغان کیور امارتي شرکت، محبوبه پرومیس خیربه بنسټ، د افغان ښځو د حرفوي مالدارۍ موسسې او د انکشاف پایدار او همګاني موسسو سره ځیني هوکړه‌لیکونه هم لاسلیک کړل.

GET IN TOUCH

SUGGEST A STORY

پژواک ستاسو د خبر له وړانديزونو خوښ دی؛ مهرباني وکړئ، دلته په کلېک کولو سره له موږ سره خپل نظر شریک کړئ

PAJHWOK MOBILE APP

د وروستي تازه معلوماتو ترلاسه کولو لپاره په خپل ګرځنده موبایل کې زموږ اپلېکشن ډاونلوډ کړئ.