<p style="text-align: justify;">کابل (پژواک، ۱۷ غویی ۱۴۰۴): په کابل کې د ایران سفیر د کانونو او پټرولیم وزارت له سرپرست سره په لیدنه کې له ایراني شرکتونو د افغانستان د کانونو سکټور کې د ګډ کار او پانګونې غوښتنه کړې ده.</p>
<p style="text-align: justify;">د کانونو او پټرولیم وزارت پر خپله <a href="https://x.com/MoMPAfghanistan/status/1919789344161710554">اېکسپاڼه</a> لیکلي، د دغه وزارت سرپرست ملا هدایتالله بدري په کابل کې د ایران اسلامي جمهوریت له سفیر علي رضا بیکدلي سره په خپل دفتر کې لیدلي دي.</p>
<p style="text-align: justify;">سرچینې لیکلي، په دې لیدنه کې دواړو خواوو د اقتصادي همکاریو پیاوړتیا، دوه اړخیزو اړیکو پراختیا او په بېلابېلو برخو، په ځانګړې توګه د هېواد د کاني زېرمو برخه کې د همکارۍ د پراختیا په اړه بحث او خبرې کړې دي.</p>
<p style="text-align: justify;">خبرپاڼه کې راغلي: «د ایران سفیر په افغانستان کې بشپړ امنیت او بډایه کانې زېرمې د دوه اړخیزو همکاریو د پراختیا لپاره یو ښه فرصت وباله، دغه راز د ایراني شرکتونو د پانګونې او د کانونو برخه کې یې د ګډ کار غوښتنه وکړه.»</p>
<p style="text-align: justify;">هغه دغه راز د افغانانو د تخصصي ظرفیت لوړولو برخه کې د خپل هېواد چمتووالی اعلان کړ.</p>
<p style="text-align: justify;">خبرپاڼه کې راغلي، د کانونو او پټرولیم وزارت سرپرست د ایراني شرکتونو له لوري د کانونو برخه کې د پانګونې د لېوالتیا هرکلی او په اړوندو برخو کې یې د دغه وزارت پر لازمو همکاریو ټینګار وکړ.</p>
