دولت او سياست

د ا.ا مشر د سمنګان ولايت له مسوولينو سره په لیدنه کې د افغانستان څو وروستۍ لسیزې ناخوالې د اختلافاتو ‎او ملوک‌الطوایفي رامنځته کېدو له امله بللې او له مسوولينو يې غوښتي چې له نظام سره د خلکو نږدې کولو لپاره هڅې وکړي.

د چین د سفیر مرستیال د افغانستان بهرنیو چارو وزارت له سیاسي مرستیال سره لیدنه کې ویلي، هېواد یې غواړي چیني سوداګر افغانستان کې پانګونې ته تشویق کړي او په نړۍوال سټېج د اسلامي امارت ملاتړ ته دوام ورکوي.

د افغانستان لپاره د ملګرو ملتونو د بشري حقونو شورا ځانګړی راپور ورکوونکی ترکیې او بیا قطر ته تللی؛ هغه ویلي، د بشري حقونو شورا له ۵۷مې غونډې مخکې به د افغانانو له بېلابېلو ډلو، کارپوهانو او حکومتي استازو سره وګوري.

د کډوالو په چارو کې د ملګرو ملتونو عالي کمېشنري (یو‌اېن‌اېچ‌سي‌ار) وايي چې د یوناما مشرې روزا اوتونبایوا زابل ولایت ته سفر کړی دی.

د ریاست‌الوزراء سیاسي مرستیال له یو شمېر قومي مشرانو سره په ليدنه کې ویلي، ا.ا د خلکو اصلاحي مشورو او نظرونو ته ارزښت ورکوي او هر افغان کولای شي خپل نظر له چارواکو سره شریک کړي.

د ا.ا مشر فاریاب ته د خپل سفر په ترڅ کې د دغه ولایت له مسوولینو سره په لیدنه کې ویلي چې د الهي حدودو د اجرا، د خلکو د مال او ځان ساتنې، د ښوونځيو زده‌کوونکو، مدرسو طالبانو او د پوهنتون محصلینو د سالمې ښوونې او روزنې او په ټولنه کې د امر بالمعروف او نهي عن‌المنکر قانون د تطبیق لپاره دې جدي هڅې وشي.

د ملګرو ملتونو د بشري مرستو همغږې‌کوونکې دفتر (اوچا) وایي چې سویډن د افغانستان د بشري مرستو له صندوق سره ۶،۸ میلیون امریکایي ډالره مرسته اعلان کړې ده.

د امریکا متحده ایالتونو د بهرنیو چارو وزارت وایي، په افغانستان کې ۴۴ کاله جګړه وه او هېواد یې نه غواړي چې دغه جګړې بیا پيل شي.

د افغانستان بهرنیو چارو وزارت سرپرست د اسلامي همکاریو سازمان د بهرنیو چارو وزیرانو شورا پنځوسمې ناستې په څنډه کې د یو شمېر هېوادونو له استازو سره په جلا ناستو کې د دوه اړخیزو اړیکو پر پیاوړتیا او د نوو فرصتونو پر رامنځته کولو خبرې کړې دي.

د ملګرو ملتونو ویاند وایي چې د دغه سازمان د امنیت شورا په سپارښتنه به له اسلامي امارت سره کار او تعامل ته دوام ورکړي.

د بهرنیو چارو سرپرست وزیر د اسلامي همکاریو سازمان د بهرنیو چارو وزیرانو په پنځوسمه غونډه کې ویلي، ا.ا له ټولو هېوادونو څخه د مثبت تعامل غوښتنه لري، هېوادونه دې له افغانستان سره اقتصادي او سوداګريزې ملګرتيا ته داخل شي او د ګنګل شویو شتمنیو د ازادولو او د ا.ا پر مشرانو د سفري بندیزونو لرې کلولو لپاره دې هڅې وکړي.

د افغانستان لپاره د اسلامي همکاریو سازمان ځانګړي استازي له امیرخان متقي سره په لیدنه کې له اسلامي امارت غوښتي څو د نجونو زده‌کړو او د ښځو کار په اړه پر خپله پرېکړه بیا کتنه وکړي.