متقي په یاوندي کې د یو شمېر هېوادونو له استازو سره کتلي

<p style="text-align: justify;">کابل (پژواک، ۱۱ وږی ۱۴۰۳): د افغانستان بهرنیو چارو وزارت سرپرست د اسلامي همکاریو سازمان د بهرنیو چارو وزیرانو شورا پنځوسمې ناستې په څنډه کې د یو شمېر هېوادونو له استازو سره په جلا ناستو کې د دوه اړخیزو اړیکو پر پیاوړتیا او د نوو فرصتونو پر رامنځته کولو خبرې کړې دي.</p>

<p style="text-align: justify;">د اسلامي همکاریو سازمان د بهرنیو چارو وزیرانو شورا پنځوسمه ناسته د وږي په ۸مه او ۹مه د کامیرون په پلازمېنه یاوندي کې جوړه شوه او د افغانستان بهرنیو چارو سرپرست وزیر مولوي امیرخان متقي هم ګډون په کې وکړ.</p>

<p style="text-align: justify;">د افغانستان بهرنیو چارو وزارت مرستیال ویاند حافظ ضیاءاحمد تکل پر خپله اېکس‌پاڼه لیکلي چې د دغه وزارت سرپرست مولوي امیرخان متقي د کاميرون پلازمېنه ياوندي کې د اسلامي همکاریو سازمان د بهرنيو چارو وزيرانو شورا پنځوسمې ناستې په څنډه کې د سعودي عربستان، ترکيې، قطر، اذربايجان، عُمان، اندونيزيا، ایران، فلسطین، سومالیا او نورو هېوادونو له استازو او د اسلامي همکاریو سازمان اړوند تخصصي ادارو له مسوولينو سره جلا جلا ناستې وکړې.</p>

<p style="text-align: justify;">هغه لیکلي چې په دې ناستو کې له یادو لورو سره د دوه اړخيزو اړيکو پر پياوړتيا او په بېلابېلو ډګرونو کې د همکارۍ د نوو فرصتونو پر ايجاد مفصلې خبرې شوې دي.</p>

<p style="text-align: justify;">متقي دغه راز په یاده غونډه کې ویلي، ا.ا له ټولو هېوادونو د مثبت تعامل غوښتنه لري، هېوادونه دې له افغانستان سره اقتصادي او سوداګريزې ملګرتيا ته داخل شي او د ګنګل شوو شتمنیو ازادولو او د ا.ا پر مشرانو د سفر بندیزونو لرې کولو لپاره دې هڅې وکړي.</p>