نورالله ځاځی

د راپورونو له مخې، د هند پلازمېنه نوي ډيلي کې د رېل‌ګاډي یوه‌ تمځای کې د ډېرې ګڼې‌ګوڼې له امله لږ تر لږه ۱۵ کسانو ژوند له لاسه ورکړی او ۱۵ نور ټپیان شوي دي.

د افغانستان د احصایې او معلوماتو ملي ادارې د روان کال له پیله تر اوسه هېواد کې څه باندې ۲،۴ میلیون برېښنایي پېژندپاڼې وېشلي او وايي، که بهرني تمویل کوونکي پیدا کړي نو د الکترونیکي تذکرو بیه به ټیټه شي.

د کلیو پراختیا او بیارغونې وزارت وايي چې د هلمند ولایت په  کجکي ولسوالۍ کې د ۷۶ میلیون افغانیو په لګښت د درېيو رغنیزو پروژو چارې پیل شوې.

د امریکا د بهرنیو چارو وزیر مارکو روبیو نن د مونیخ امنیتي کنفرانس کې د ګډون په موخه جرمني او بیا له هغه وروسته منځني ختیځ ته سفر کوي.

د افغانستان ملي دفاع وزارت وايي، کشفي او استخباراتي منسوبینو د یو لړ اوپراتیفي راپورونو پر اساس د تخار فرخار ولسوالۍ کې ګڼ شمېر بېلابېل ډوله وسلې او مهمات کشف او ترلاسه کړي.

د شهیدانو او معلولینو چارو وزارت له دوو خیریه مؤسسې سره د څه باندې ۲۱۸ زره امریکایي ډالرو په ارزښت دوه هوکړه‌لیکونه لاسلیک کړي دي.

د کابل ښار دوېمې ناحیې اړوند نادر پشتون واټ سیمه کې، د نږدې ۳۴ میلیون امریکايي ډالرو په لګښت د نوي خیرخواه سوداګریز مارکېټ د جوړولو چارې بشپړې شوې.

د رياست‌الوزراء د دفتر عمومي رییس کابل کې د چین له سفیر سره په ليدنه کې هیله څرګند کړې چې ‎د اسلامي امارت په رسمیت پېژندلو کې خپلې هڅې ونه سپموي.

له پېښو سره د مبارزې د چمتووالي ملي ادارې له یوې موسسې سره د څه باندې ۲۶۰ زره امریکايي ډالرو په ارزښت د ګډو همکاریو هوکړه‌لیک لاسلیک کړ.

د بهرنیو چارو وزارت سرپرست کابل کې د ناروې له سفیر سره په لیدنه کې له نړۍوالو سره پر مثبت تعامل ولاړو اړیکو هرکلی کړی او د نړۍ له هېوادونو یې غوښتې چې له افغانانو سره په اقتصادي وده او پراختیايي چارو کې همکاري وکړي.

د افغانستان د بهرنيو چارو وزارت وایي، د اسرائيلو د مشر له لوري د خپلواک فلسطیني دولت له جوړېدو انکار او پر دې ټینګار چې فلسطینیان دې د سعودي عربستان پر قلمرو خپل دولت جوړ کړي، غندي او دا چاره ناشونې او د سعودي د حاکمیت نقض بولي.

د صنعت او سوداګرۍ وزارت وایي، د تېر ۲۰۲۴ میلادي کال په اوږدو کې افغانستان له یو شمېر هېوادونو سره د ۱۲ میلیارده او ۴۲۲ میلیون امریکایي ډالرو په ارزښت سوداګریزه راکړه ورکړه درلوده.