کابل (پژواک، ۲۲ سلواغه ۱۴۰۳): د رياستالوزراء د دفتر عمومي رییس کابل کې د چین له سفیر سره په ليدنه کې هیله څرګند کړې چې د اسلامي امارت په رسمیت پېژندلو کې خپلې هڅې ونه سپموي.
له ارګه په خپره شوې خبرپاڼه کې راغلي چې د رياستالوزراء مقام د دفتر لوی رییس ډاکټر ملاعبدالواسېع نن کابل کې د چین له سفیر ژاو شینګ سره ولیدل.
د رياستالوزراء د مقام د دفتر لوی رییس ویلي، افغانستان او چین له پخوا راهیسې نږدې او پراخه اړیکې لري.
ده ویلي: «چین لومړنی هېواد و چې د اسلامي امارت سفیر یې ومانه او افغانستان ته یې خپل سفیر راواستاوه چې دا د دواړو هېوادونو د ښو اړیکو ښودنه کوي، هیله ده چې چین ولسي جمهوریت د اسلامي امارت په رسمیت پېژندلو کې هم خپلې هڅې و نه دریغوي.»
هغه زیاته کړې، څرنګه چې د چهارچنار ماڼۍ د چین په همکاري سره رغول شوې ده او هیله لري چین له اړتیا سره سم د اسلامي امارت له حکومت سره خپله همکاري او توجه جاري وساتل شي.
د رياستالوزراء د دفتر لوی رئیس دغهراز ویلي، اسلامي امارت د امنیت په برخه کې جدي دی او له همدې امله په ټول هېواد کې سراسري امنیت ټینګ شوی دی.
د هغه په وینا، د واخان لارې له پرانیستلو سره سم به د دواړو هېوادونو ترمنځ راکړه ورکړه او تګ راتګ زیات شي.
کابل کې د چین سفیر وویل، د چین او افغانستان مناسبات له پخوا ښه دي او له ۲۰۲۱ کال را وروسته په کې لا ښه والی راغلی او هېواد یې په نړۍوالو سازمانونو او غونډو کې د افغانستان ملاتړ کړی.
نوموړي زیاته کړه، د چین او افغانستان ترمنځ سوداګري، صادرات او واردات او د خلکو تګ راتګ زیات شوی دی او تېر کال کې څه باندې یوولس زره افغانانو ته د وېزې اسانتیاوې برابرې شوې چې له چین لیدنه وکړي.
دی زیاتوي، په بامیانو کې د چین هېواد د برېښنا، په کندهار ولایت کې د روغتون او په تخار کې د امو د تېلو پروژو چارې روانې دي.
د هغه په خبره، د واخان لارې پرانیستې سره چین کومه ستونزه نه لري.
