محمدعلي سیف: د قانوني افغانانو ایستل به د افغانستان او پاکستان اړیکې خرابې کړي

<p style="text-align: justify;">کابل (پژواک، ۳ غویی ۱۴۰۳): خیبرپښتونخوا کې د حکومت ویاند وایي، پاکستان کې په قانوني توګه د مېشتو افغانانو ایستل به د دواړو هېوادونو ترمنځ اړیکې خرابې کړي.</p>

<p style="text-align: justify;">پاکستانۍ رسنۍ<strong> <a href="https://www.dawnnews.tv/news/1231365/">ډان نیوز</a></strong> تېره شپه د خیبرپښتونخوا د حکومت ویاند محمدعلي سیف له قوله لیکلي، هغه افغان کډوال چې قانوني اسناد لري او د دغو اسنادو پر اساس پاکستان کې اوسېږي، باید نه وځورول شي او نه وایستل شي.</p>

<img class="aligncenter wp-image-609410 " src="https://pajhwok.com/wp-content/uploads/2024/04/محمدعلي-سیف.png" alt="" width="657" height="394" />

<p style="text-align: justify;">نوموړي زیاته کړې چې دا ډول اقدامات به د افغانستان او پاکستان ترمنځ اړیکې خرابې کړي.</p>

<p style="text-align: justify;">هغه ټینګار کړی، که په قانوني توګه د مېشتو افغانان پر ضد کوم ګام پورته شي نو د افغانستان او پاکستان ترمنځ به کرکه، ناسم پوهاوی او بې‌اعتمادي رامنځته شي.</p>

<p style="text-align: justify;">د نوموړي د معلوماتو له مخې، په خیبرپښتونخوا کې د دوی احصایې ښیي چې په دغه صوبه کې ۳۵۹ زره افغانان په قانوني توګه اوسېږي.</p>

<p style="text-align: justify;">د راپورونو له مخې، د تېر میلادي کال له اکتوبر راوروسته له پاکستانه شاوخوا ۵۰۰ زره افغانان په زور وایستل شول او د جبري ایستلو دویمه لړۍ د روان لمریز کال د وري میاشتې په ۲۸مه بېرته پیل شوه او ټاکل شوې شاوخوا ۸۰۰ زره افغان کډوال راوباسي.</p>