خوست- ګردېز (پژواک، ٢٧ ورى ٩٤): د خوست د ګربزو ولسوالۍ د شيخ امير په لېسه کې يو کتابتون پرانيستل شو بلخوا په پکتيا کې د کليو پراختيا رياست د ملي پيوستون پروګرام دفتر ته په ٤٣٥ متر مربع ځمکه کې د نوې ودانۍ جوړولو چارې پيل شوې.
د ګربزو د شيخ امير په لېسه کې کتابتون د کتاب پاچاهي په نوم د يوې غونډې په ترڅ کې چې ځايي چارواکو، د پوهنې کارکوونکو، قومي مشرانو، مدني فعالانو، ځوانانو او زده کوونکو ګډون کړی و، پرانيستل شو.
د يادې ولسوالۍ سکتوري مدير فيروز غونډې ته وويل چې دغه کتابتون د ولسوالۍ مقام په هڅو د ګربزو د ځوانانو د ټولنې په چوکاټ کې جوړ او د خلکو له لوري د کتابونو په مرستې سره پرانيستل شو.
هغه زياته کړه: ((يواځې نن ورځ دې کتابتون ته سلګونه ټوکه اسلامي، ادبي، اقتصادي، تاريخي او نور بېلابېل ډوله کتابونه د فرهنګيانو او د ولسوالۍ مقام له لوري ډالۍ شول.))
د ولسوالۍ سکتوري مدير فيروز دغه راز وويل چې له کتابتون سره به د هر ډول اړينو کتابونو د مرستې لړۍ دوام ولري او هيله من دي چې په نږدې راتلونکي کې به يې شمېر زرګونو ټوکو ته ورسېږي.
د ګربزو د ځوانانو ټولنې مرستيال ولي شاه حليم يادې غونډې ته په خپلو خبرو کې د ولسوالۍ په کچه د مطالعې د مينه والو لپاره د کتابتون جوړول د علمي کچې لوړاوي لپاره ډېر مهم وبلل.
ولي شاه حليم له دولت، خيريه ټولنو، فرهنګيانو او مدني فعالانو څخه وغوښتل، چې د کتابتون د بډاينې لپاره د کتابونو په ورکړه کې خپلې مرستې ونه سپموي.
د ګربزو ولسوالۍ يو مدني فعال انجنير بُلبل محمد له پژواک خبري اژانس سره په خبرو کې د کتابتونونو جوړول د ځوانانو د معلوماتو د زياتېدو او د مطالعې د کلتور د پياوړتيا لپاره ډېر اغېزناک ياد کړل.
نوموړي د ګربزو ولسوالۍ له زده کوونکو او نورو ځوانانو غوښتنه وکړه چې له کتابتون څخه د خپلې ټولنې د اصلاح په خاطر له اسلامي، فرهنګي، اقتصادي، ټولنيزو او په نورو برخو کې له مطالعې واخلي.
د يو بل خبر له مخې، په پکتيا کې د کليو پراختيا رياست د ملي پيوستون پروګرام دفتر ته په ٤٣٥ متر مربع ځمکه کې د نوې ودانۍ جوړولو چارو چارې پيل شوې.
د پکتيا د کليو پراختيا رييس انجنير ضابط احمدزي وويل، پر دې ودانۍ ١٣،٦ ميليونه افغانۍ لګښت راځي چې د نړيوال بانک له خوا ورکول کېږي.
احمدزي وويل چې اوس مهال د ملي پيوستون اداره په يوه کرايي کور کې خپل رسمي کارونه مخته وړي.
د ده د معلوماتو له مخې، د دې ادارې لپاره نوې ودانۍ د ګردېز ښار شمال لوېديځ په يوه څنډه کې د کليو پراختيا رياست تر څنګ جوړېږي او رغنيزې چارې به يې په يوه کار کې بشپړې شي.
که څه هم په تېرو ١٤ کلونو کې په پکتيا کې بېلابېلو دولتي ادارو ته نوې ودانۍ جوړې شوې او يا هم رغول شوې دي، خو لا هم يو شمېر دولتي ادارې ودانۍ نه لري او خپل کارونه په کرايي دفترونو کې مخته وړي.
غړيYou need to subscribe to view the full article. Please login or register a new account.
