<p>لښکرګاه (پژواک، ۳۰ تله۹۴): د هلمند امنیه قوماندان وايي چې د دغه ولايت په ځينو سيمو کې پوځي عمليات دوام لري چې په ترڅ کې يې ١٦ وسله وال طالبان وژل شوي دي.</p>
<p>دا په داسې حال کې ده چې وړمه ورځ وسله والو طالبانو د لښکرګاه ښار د څلورمې امنيتي حوزې اړوند د باباجي سيمه او لښکرګاه ته څېرمه د نادعلي ولسوالۍ ځينې سيمې نيولې وې.</p>
<p>خو پرون امنيتي چارواکو وويل چې يادې سيمې يې بېرته له طالبانو نيولې دي.</p>
<p>د اړوندې موضوع په اړه د هلمند امنيه قوماندان پاسوال نبي جان ملاخېل د تلې په٣٠مه پژواک خبري اژانس ته وويل چې پرون لښکرګاه ښار ته تازه دمي سرتېري رسېدلي او د وسله والو پر وړاندې يې پوځي عمليات پيل کړي دي.</p>
<p>د ملاخېل د معلوماتو له مخې، دمګړۍ د لښکرګاه اړوند د باباجي سيمې تر څنګ د نادعلي ولسوالۍ په چاه انجیر، لوى مانده، کوفکه، نو اباد او د ګرشک ولسوالۍ په مالګیر او ځینو نورو سیمو کې عمليات روان دي.</p>
<p>هغه وايي چې په دې جګړه کې تر اوسه د طالبانو د سرې قطعې قوماندان ملا ناصر او د يو بل قوماندان ملا صديق په ګډون ١٦ وسله وال وژل شوي او يو شمېر نور ټپيان دي.</p>
<p>د ده په وينا، ټولې هغه سيمې به بېرته له طالبانو ونيول شوې چې اوسمهال پرې تګ راتګ کوي او يا يې په تېرو دوو ورځو کې نيولې دي.</p>
<p>هغه زياته کړه: ((لښکرګاه ښار اوس مهال له ګواښونو خلاص شوی او زه ډاډ درکوم چې طالبان نور پرمختګ نه شي کولاى.))</p>
<p>دغه راز د نادعلي ولسوالۍ په چاه انجير سيمه کې د پوليسو ځايې مسوول سردار محمد پژواک ته وويل چې په سيمه کې کافي سرتېري نه لري خو د ژوند تر پايه به د طالبانو پر وړاندې جګړه وکړي.</p>
<p>هغه زياته کړه: ((موږ ته بايد د ملي اردو او ملي پوليسو تازه دمي سرتيري له پوره امکاناتو سره را ولېږل شي.))</p>
<p>په سيمه يو پوليس خان محمد وايي: ((پنځه ورځې کېږي چې د طالبانو پر وړاندې جګړه کې مې وسله له لاسه نه ده غورځولې.))</p>
<p>ده هم په حکومتي مشرانو غږ وکړ چې دې سيمې ته نوي سرتېري له تجهزاتو سره يو ځاى ولېږي.</p>
<p>د چاه انجير سيمي اوسېدونکي عاشق الله پژواک ته وويل: ((په دې سيمه کې جګړه ده، ډېر خلک کورونو پرېښودو ته اړ شوي دي.))</p>
<p>ده پر امنيتي ځواکونو غږ وکړ چې په دې سيمه کې امنيتي حالات کابو کړي.</p>
<p>وسله وال طالبان هم په هلمند کې د امنيتي ځواکونو او طالبانو تر منځ نښته تاييدوي.</p>
<p>د دې ډلې وياند قاري يوسف احمدي پرون پژواک ته ويلي وو: ((که چېرې ملکي او نظامي کسان موږ ته تسلیم شي، د لښکرګاه ښار د نیولو پر مهال به ورته عفوه وشي.))</p>
<p>هلمند د افغانستان د نا امنه ولايتونو له ډلې دى چې اوسمهال نوزاد ولسوالۍ ټوله او د موسى کلا ولسوالۍ ډېرې سيمې د طالبانو په ولکه کې دي.</p>
<p> </p>
<p> </p>
<p> </p>
<p> </p>
