منځپانګې ته تلل
سه‌شنبه ۱۷ نومبر ۲۰۲۶ · کابل ۹:۱۱ غ.م
۷°صاف · ↑۱۴° ↓۱°د هوا کیفیت: منځنی
غړي

باميانو کې ښوونکو لاريون وکړ

· ۳ دقیقې لوستل · ۱۰۱ کتنې

باميان (پژواک، ١١ لړم ٩٤): د باميانو ولايت د ورث ولسوالۍ ښوونکو په لاريون لاس پورې کړى او ګواښ يې کړى چې که معاشونه يې ورنه کړل شي نو د زده کوونکو د ازموينو پر پايلو به کار ونه کړي.

لسګونه ښوونکو نن سهار د باميانو ولايت له هريکين څلورلارې څخه د پوهنې تر رياست پورې پلى يون وکړ او ويې ويل چې دولت ورته د شپږو مياشتو معاشونه نه دي ورکړي.

ښوونکو زياته کړه که چېرې يې معاشونه ورنه کړل شي نو په مدني اعتراضونو به لاس پورې کړي.

د ورث د يوه ښوونځي مدير محمدانور محمدي وويل چې که چېرې دولت د ښوونکو معاشونه ورنه کړي، د زده کوونکو د ازموينو په هېڅ پايلې به کار ونه کړي او دا چې د دغه کار زيان زده کوونکو ته رسېږي؛ مسووليت يې د دولت پر غاړه دى.

محمدي زياته کړه چې په ورث ولسوالۍ کې ٣٧  زره زده کوونکو ته په سلو ښوونځيو کې د سلګونه ښوونکو له خوا تدريس کېږي.

هغه زياته کړه: "معاش زموږ حق دى، دولت زموږ معاشونه ولې نه راکوي؟"

يوې بلې لاريون کوونکې ليلا محمدي پژواک خبري اژانس ته وويل چې دوى باميانو ښار ته د خپل حق غوښتلو لپاره له ډېر لرې راغلي دي.

يادې ښوونکې زياته کړه: "موږ خپلو زده کوونکو ته په ښه توګه درس ورکړى او بې وزله طبقه يو، دولت پر موږ ولې دا ډول ظلم کوي؟"

هغه وويل چې د پوهنې له رياست سره يې قرارداد لاسليک کړى، خو تر اوسه پورې ورته د ٨ مياشتو معاش نه دى ورکړل شوى.

د باميانو د پوهنې رياست سرپرست محمد حسين شريفي وويل چې د ښوونکو د معاشونو په برخه کې دوه ستونزې موجودې دي. يوه دا چې کوم قراردادونه له ښوونکو سره شوي؛ د پوهنې د ولسواليو مديريتونو نه دي اجرا کړي چې د پوهنې وزارت ته ولېږل شي او له هغه وروسته د ماليې وزارت دې په دې اړوند خپل اجراات وکړي.

دويمه دا چې د ماليې وزارت د باميانو د پوهنې په برخه کې د بوديجې ٦٠ ميليونه افغانۍ کسر رامنځته کړى دى.

هغه څرګنده کړه: "باميانو کې دغه ستونزې د حل وړ نه دي او کوم زيانونه چې ښوونکو او زده کوونکو ته رسېږي، بايد د پوهنې او ماليې وزارتونه ورته ځواب ووايي."

د باميانو د والي وياند عبدالرحمن احمدي وايي چې د ښوونکو د معاشونو ستونزه به د ماليې له وزارت سره مطرح کړي او له ماليې وزارت څخه به د سپيناوي غوښتنه هم وکړي، څو په راتلونکي کې کومه ورته پېښه رامنځته نه شي.

د باميانو ولايت په کچه، د ٧٠ زره نجونو په ګډون له ١٤٥ څخه ډېر زده کوونکي په ٢٧٠ ښوونځيو کې د ٢٨٥٠ رسمي او ٢٧٥٠ غير رسمي "اجير" ښوونکو له لوري تدريس کېږي.

د معارف رياست سرپرست وايي چې ټولو اجيرو ښوونکو تر اوسه پورې خپل ٨ مياشتني معاشونه نه دي ترلاسه کړي.

تېره مياشت د باميانو مرکز د ښوونځيو ١٥٠ رسمي او غيررسمي ښوونکو د دوى د معاشونو د نه ورکړې له امله په تحصن لاس پورې کړ چې د هغوى په دې کار سره د نجونو او هلکانو ٣٠ ښوونځي تړل شوي و.

غړي

You need to subscribe to view the full article. Please login or register a new account.

اړوند خبرونه

ټول ښوونه او روزنه