کندوز (پژواک،٧ ليندۍ ٩٤): د قلعه زال او دشت ارچي ولسواليو ځيني اوسېدونکي واييؤ د امنيتي ځواکونو او طالبانو ترمنځ نښته کې د ملکي کسانو مرګ ژوبلې ترڅنګ د هستوګنې کورونه هم ويجاړ شوي، چې دا وضعيت نور د زغم وړ نه دى.
دشت ارچي ولسوالۍ درې مياشتې وړاندې د طالبانو لاس ته ورغله او تېره مياشت د ګډو امنيتو ځواکونو عملياتو په ترڅ کې د هغوى له ولکې بهر شوه.
د قلعۀ زال ولسوالۍ د کندوز ښار سقوط پرمهال، د تلې مياشت کې د يوې اونۍ لپاره د طالبانو په واک کې وه، چې وروسته د دولت تر کنټرول لاندې راغله.
خو وسله وال مخالفين لا هم د دواړو ولسواليو په شاوخوا سيمو کې فعاليت کوي او له دولتي ځواکونو سره کله ناکله جګړې کوي.
د سيمې اوسېدونکي وايي، د دولتي او امنيتي ځواکونو تر منځ نښتې د ملکي کسانو مرګ ژوبلې، کورونو سوځېدو او بې ځايه کېدو لامل شوې دي.
د دشت ارچي ولسوالۍ د قرلق کلي اوسېدونکي عبدالرسول پژواک خبري اژانس ته وويل، تېره اونې د نوموړي د ورور پر کور د هاوان مرمۍ لګېدو له امله، د هغه د کورنۍ دوه کسان ووژل شول او مېرمن يې ټپي شوه.
ياد اوسېدونکى چې د عدالت غوښتنې لپاره د کندوز مرکز ته ورغلى و، زياته يې کړه: "هره ورځ، هره شېبه جګړې له خلکو قرباني اخلي، تاسو د دشت ارچي ولسوالۍ کلينيک ته ورشئ او وګورئ چې څومره ټپيان تر درملنې لاندې دي، د خلکو کورونه او هټۍ سوځي؛ خو دولت يو ګام هم پرمختګ نه دى کړى."
نوموړي چې کندوز ښار کې د يوه خپلوان په کور کې ژوند کوي، وويل چې له اقتصادي ستونزو سره لاس اوګرېوان دى او ان مزودکاري هم نه پيدا کېږي، انتظار وباسي چې په سيمه کې يې امنيت خوندي شي او خپلو کورونو ته ستانه شي.
د دشت ارچي ولسوالۍ مرکز اوسېدونکي معلم امين الحق وويل، د سيمې ډېرى اوسېدونکي د ښکېلو غاړو درنو وسلو د ډزو او د ډاډمن امنيت نه شتون له امله، مالي او ځاني قرباني ورکوي او له دې وضعيت څخه ستړي شوي دي.
هغه زياته کړه چې تېره اونۍ له نامعلوم لوري د هاوان مرمۍ يې پر کور ولګېده، چې له امله يې کور وسوځېد او يو ٩کلن ماشوم يې ټپي شو.
دا اوسېدونکى ادعا کوي چې امنيتي ځواکونو يواځې د دشت ارچي چوک شاوخوا سيمې نيولې دي او پاتې نورو سيمو کې طالبان دي او په وروستۍ يوه مياشت کې هېڅ پرمختګ نه دى شوى.
هغه وويل: "د خلکو مالونه او شتمنۍ، کورونه او هټۍ وسوځېدلې، اوس دې دولت وخت راکړي، څو لږ تر لږه خپل څاروي او د کور مالونه وباسو چې د له منځه تلو مخه يې ونيول شي."
ياد اوسېدونکى چې د دشت ارچي چوک کې هټيوال دى، وويل چې ټول دوکانونه په تېره يوه مياشت کې بند وو، ځينې د جګړو پرمهال سوځېدلي او دولت خلکو ته د پرانيستلو اجازه نه ورکوي.
خو د کندوز امنيه قوماندان مل پاسوال محمد قسيم جنګلباغ وويل، امنيتي ځواکونو دشت ارچي ولسوالۍ کې ډېر پرمختګونه کړي دي اوپوځي عمليات به د وسله والو مخالفينو تر بشپړو ځپلو پورې دوام وکړي.
نوموړي زياته کړه، د ملکي تلفاتو په اړه هغوى ته راپور نه دى ور رسېدلى او دولتي ځواکونه تل د عملياتو پلان په کره توګه طرحه او پلى کوي، څو ملکي کسانو ته زيان وا نه وړي.
په ورته وخت کې د قلعه زال ولسوالۍ اوسېدونکي وايي، اربکيان د کلوخ تپه له سيمې څخه د ولسي خلکو پر کورونو چې ګواکې د دولت وسله وال مخالفين په کې دي، د درنو وسلو تر ډزو لاندې راولي چې له امله يې خلکو ته زيان ور اوړي.
د قلعۀ زال ولسوالۍ د قلعه کلي اوسېدونکي مصطفى قل وويل، چې خلک له دې امله خپل کورونه پرېږدي، څو و نه وژل شي او سلګونه کورنۍ ددې ولسوالۍ صالح اباد سيمې ته بې ځايه شوې دي.
نوموړى چې کور يې د درنې وسلې د يوې مرمۍ لګېدو له امله زيانمن شوى دى، وويل چې اوسهمال د اربکيانو او طالبانو تر منځ نښته غلې ده؛ خو خلک به د ژمي موسم کې له زياتو ستونزو سره مخ شي او حکومت بايد ډېر ژر امنيت ټينګ کړي، څو خلک بېرته خپلو کورونو ته ستانه شي.
اربکيان هغه ولسي ځواک دى چې له معاش اخيستو پرته د خپلو سيمو امنيت خوندي کولو کې ونډه اخلي؛ خو دا نوم اوس هغو ځواکونو ته اخيستل کېږي چې د دولت په اډانه کې رسميت نه لري او د دولت له لوري د وسله والو مخالفينو پرضد پر وسلو او تجهيزاتو سنبالېږي.
د قلعه زال اوسېدونکي وايي، چې طالبان هم له درنو وسلو کار اخلي چې خلکو ته ځاني او مالي تاوانونه ور اړوي.
د هغوى په وينا، دشت ارچي په دوو برخو وېشل شوې ده، دولتي ځواکونه د سيند دا غاړه د ولسوالۍ مرکز او طالبان د سيند پورې غاړه د اق تپه سيمه کې واک چلوي.
د اق تپه سيمې يوه اوسېدونکي چې د نوم له اخيستلو يې ډډه کوله، وويل: "طالبان له خلکو عُشر اخلي او که په چا شمکن شي، چې دولت کې کار کوي، هغوى نيسي."
خو طالبان تل په دشت ارچي او قلعه زال ولسواليو کې دولتي ځواکونو ته د مرګ ژوبلې اړولو ادعا کوي او پخوا يې ويلي وو، چې هغوى له خلکو په جبر عُشر نه اخلي او د سيمې خلک په خپله خوښه له طالبانو سره مرسته کوي.
د قلعۀ زال اوسېدونکي وايي، که وضعيت همدا ډول دوام ومومي، د سيمې خلک په داسې حال کې چې ساړه هم په رارسېدو دي، د خپلو کورونو پرېښودو ته اړ شي.
هغوى ګواښ کوي، که د کورونو مالونو او جنسونو ته د ايستلو موکه ورته برابره نه شي، په کورونو کې ټول شته مالونه به يې له منځه ولاړ شي.
د کندوز امنيه قوماندان وويل، هڅه کوي څو د کورونو اسباب او مالونو بهرکولو لپاره يوه لار ومومي چې خلک وتوانېږي له کورنو او هټيو څخه خپل مالونه وباسي.
جنګلباغ زياته کړه چې د امنيتي ځواکونو عمليات زياتې لاسته راوړنې درلودې او عمليات به د وسله والو مخالفينو تر ځپلو پورې دوام ومومي.
د ده په وينا، د دشت ارچي ولسوالۍ چاڼيزو عملياتو له ختمېدو څخه وروسته به، د دې عملياتو لمن د قلعه زال، امام صاحب او چهاردرې ولسواليو ته پراخه شي.
په دې وروستيو کې د ملي دفاع وزارت چارواکو هم ويلي دي، چې د " طوفان ١٠" په نوم عمليات به د ژمي موسم کې هم د کندوز ناامنو ولسواليو کې دوام وکړي.
له بل پلوه، ولسمشر محمد اشرف غني دوه ورځې وړاندې کندوز ته تللى و، چې درې نوې ولسوالۍ يې منظور کړې او د تلې مياشتې کې د طالبانو په لاس د کندوز ښار سقوط په تړاو يې، د دې ولايت د ملي امنيت يو شمېر کارکوونکي له دندو ګوښه کړل او له خلکو سره يې ژمنه وکړه چې بشپړ امنيت به ټينګوي.
غړي
You need to subscribe to view the full article. Please login or register a new account.










