منځپانګې ته تلل
دوشنبه ۱۶ نومبر ۲۰۲۶ · کابل ۹:۵۷ غ.م
۱۰° — په ټولو ولایتونو کې هوا
صاف · ↑۱۴° ↓۱°
د هوا کیفیت: منځنی
غړي

د کندوز ښاريان د دغه ښار له سقوط وروسته د حکومت له سل ورځنيو کړنو ناخوښ دي

· ۶ دقیقې لوستل · ۱۶۳ کتنې

کابل (پژواک، ١٦ مرغومی ٩٤): د طالبانو په لاس د کندوز ښار له سقوطه سل ورځې تېرې شوې دي؛ خو خلک نيوکه کوي چې حکومت تر دې دمه نه ده توانېدلى څو د کندوز ښار له څنډو طالبان لرې کړي.

کندوز ښار د تلې په شپږمه طالبانو ونيو خو د امنيتي ځواکونو د عملياتو ترسره کولو په ترڅ کې بريالي شول څو په دوو اونيو کې په تدريجي ډول هغوى له ښاره بهر کړي.

دا جګړه ملکي خلکو، امنيتي ځواکونو او طالبانو ته د سر په بيه تمامه شوه.

سيمه ييزي شمېرې ښيي چې د کندوز ښار په جګړو کې څه باندې ١٨٠ ملکي کسان وژل شوي دي او ٣٣٠ نور ټپيان شوي وو.

خو په افغانستان کې د ملګرو ملتونو مرستندوی دفتر (يوناما) د بشري حقونو لپاره د ملګرو ملتونو د عالي کمېشنرۍ دفتر "OHCHR" تازه موندنې ښيي چې په دې جګړو کې شاوخوا ٢٩٠ ملکي کسان وژل شوي دي او ٥٦٠ نور ټپيان شوي وو.

د سيمه ييزو شمېرو له مخې، په دې جګړه کې څه باندې ١٥٠٠ وسله والو طالبانو او امنيتي ځواکونو ته مرګ ژوبله اوښتې ده.

په يادو تلفاتو کې د امنيتي ځواکونو او طالبانو شمېرې په ګوته شوې نه دي؛ خو په شمال ختيځ کې د پامير ٢٠ فرقې قومانداني ادعا کوي چې د کندوز ښار له سقوطه وروسته، د طالبانو د وتلو څېرو په ګډون شاوخوا ١٣٤٥ وسله وال طالبان وژل شوي دي.

د کندوز جګړې دولتي او ټولګټو تاسيساتو ته خورا درانه زيانونه اړولي دي او ٢٠ کورنۍ چې د کسانو ټولټال شمېر يې سلو زرو ته رسېده، ګاونډيو ولايتونو او کابل ښار ته کډه کړل، تر اوسه پنځوس سلنه يې خپلو کورونو ته ستانه شوي دي؛ خو پاتې نور يې د امنيت ټينګښت د بېرته ستنېدو شرط بولي.

د دې تر څنګ شاوخوا ١٢ دولتي ادارې په بشپړه توګه سوځېدلې دي او د ٦٣ نورو ادارو وسايل لوټ شوي دي او د اپارتمانونو، لوړپوړو ودانيو، سرايونو، سوداګريزو مارکېټونواو خصوصي بانکونو په ګډون د هستوګنې لسګونه کورونه ويجاړ شوي دي او وسايل او توکي يې لوټل شوي دي.

د طالبانو په لاس د کندوز ښار له سقوطه وروسته، ولسمشر اشرف غني کندوز ته سفر وکړ او د شمال ختيځ زون " تخار، بغلان، کندوز او بدخشان" ولايتونو لپاره يې د پامير ٢٠ فرقه او سپين زر ٨٠٨ ساحوي زون منظور کړ.

نوموړي په خپل دويم سفر کې د ملي امنيت ټول منسوبين له دندو ګوښه کړل، د ملي پوليسو لسګونه بستونه يې نورو ولايتونو ته تبديل کړل، دری نوې ولسوالۍ يې منظور او له خلکو يې د طالبانو د ځپلو په موخه د چاڼيزو عملياتو ترسره کولو لپاره درې اوونۍ وخت واخيست.

خو خلک وايي چې لا هم طالبان د کندوز ښار په څنډو کې فعاليت کوي تر دې چې له دوو اونيو راهيسې د ماښام له پنځو بجو د سهار تر شپږو بجو د مخابراتي شبکو فعاليتونه بندوي چې د ښاريانو ستونزې يې نورې هم زياتې کړې دي.

د هغوى په وينا، طالبان چې د کندوز ښار له نيولو مخکې په کومو سيمو کې شتون درلود اوس هم په هماغو سيمو کې فعاليت کوي، چې دا سيمې د کندوز له ښاره پنځه کيلومتره لرې پرتې دي.

هغوى په سوېل کې د ګورتپه، په ختيځ کې درکنم او حضرت سلطان، په لوېديځ کې زاخېل او انګورباغ او د کندوز ښار شمال لور ته د چرخاب او ناصري په سيمو کې تګ راتګ کوي.

د کندوز ولايتي شورا وايي، کومې ژمنې چې حکومت او سيمه ييزو مسوولينو کړې وې، هغه يې ترسره نه کړې او خلک د خپل راتلونکي په اړه اندېښمن دي.

د کندوز ولايتي شورا مشر محمديوسف ايوبي پژواک خبري اژانس ته وويل: "کندوز ښاريان هيله من وو چې اوس د حکومت پام کندوز ته ور اوښتى دى او ښايي په ټول ولايت کې امنيت خوندي کړي او په دې موده کې بايد حکومت په پرله پسې توګه پر طالبانو هوايي او ځمکني بريدونه ترسره کړي واى څو په هسته کې له منځه وړل شوي وو؛ خو څرنګه چې اړينه وه کار ونه شو."

هغه زياته کړه چې خلک د کندوز ښار له سقوطه وروسته د حکومت د سلو ورځو کړنو په اړه ناخوښ دي او که وضعيت همدا ډول دوام ومومي، د راتلونکي کال په پسرلي کې به د کندوز ښاربېرته د طالبانو لاس ته پرېوځي.

ايوبي وويل چې لا هم طالبان د ښار په څنډو کې په ازاد ډول تګ راتګ کوي، کومې وسلې او وسايط يې چې د کندوز ښار په جګړه کې ترلاسه کړي دي، هره شېبه خلک ګواښي.

د کندوز ښار يوه اوسېدونکي شفيق الله وويل، ځينې کورنۍ چمتو شوې دي چې د نا امنيو په صورت کې به د راتلونکی کال تر پسرلي پورې نورو ولايتونو ته کډه شي.

دغه اوسېدونکي وويل: ((دا چې خلک د حکومت له دروغجنو ژمنو ستړي شوي او ماشومان د طالبانو او برمته ګرو له خوا د تښتونې له وېرې ښوونځي او مدرسې ته نه استوي، اړ دي چې بيا کډوال او سرګردان شي.))

هغه وايي چې د يوې دولتي ادارې مامور دى او ادعا يې وکړه چې دولتي کار کوونکي هم په وېره او ډار کې ژوند کوي او که چېرې حکومت په نږدې ورځو کې د امنيت لپاره کوم پروګرام ونه لري، ځيني دولتي کارکوونکي به دندې پرېږدي.))

دا په داسې حال کې ده چې طالبانو د کندوز ښار د نيولو پر مهال د دولتي ارګانونو ګڼ کارکوونکي پيدا او شکنجه کړل.

خو سيمه ييزو چارواکو تل د چاڼيزو عملياتو پر پيل ټينګار کړى او ډاډ ورکوي چې د کندوز ښار پېښه به بيا رامنځته نه شي او په نږدې راتلونکې به زيانمنې سيمې د هغوى له شتونه پاکې کړي.

د کندوز د امنيې قوماندانۍ د امنيت امر سمونوال محمد معصوم هاشمي وويل چې د کندوز په مرکز کې د طالبانو د ځپلو لپاره د سراسري عملياتو چمتووالى نيولى شوى دى.

هغه په دې وروستيو کې د کندوز په ځينو برخو کې ترسره شوي شپني عمليات بريالي وبلل او د عملياتو په ترڅ کې يې له امنيتي ځواکونو سره د خلکو پر همکارۍ ټينګار وکړ.

د ويلو ده چې د ملي اردو د کومانډو ځانګړو ځواکونو شاوخوا لس ورځې وړاندې د کندوز ښار شاوخوا عمليات وکړل او وروسته يې عمليات د دشت ارچي خواته وغځول او لاسته راوړنې هم درلودې.

تېره اوونۍ د ملي دفاع وزارت د ځانګړو عملياتو د فرقې د لومړۍ لوا قوماندان بريد جنرال ارکانحرب امان الله مبين پژواک ته ويلي وو چې د اقتاش بويين، سنګ ګوش، حقر قشلاق، قچي، کنم، حضرت سلطان او د کندوز ښار نورو سيمو کې عمليات وشول چې لسګونه وسله وال مخالفين په کې ووژل شول.

په دشت ارچي کې د چورلکو پر ملتيا او کومانډو ځواکونو په شپنيو عملياتو کې طالبانو ته درنه مرګ ژوبله اوښتې ده.

امنيتي چارواکي وايي چې د دغو عملياتو موخه د طالبانو کمزوري کول وو چې وروسته به د دې سيمو د چاڼ لپاره عمومي ځمکني عمليات پيل شي.

خو طالبانو تل ادعا کړې چې په کندوز کې فعال دي او د امنيتي ځواکونو د بريدونو په مقابل کې يې پرېکنده ځواب ورکړى دى.

 

 

 

 

غړي

You need to subscribe to view the full article. Please login or register a new account.

اړوند خبرونه

ټول امنیت او جرمونه