منځپانګې ته تلل
سه‌شنبه ۱۷ نومبر ۲۰۲۶ · کابل ۵:۱۸ غ.م
۱° — په ټولو ولایتونو کې هوا
نیمه ورېځ · ↑۱۴° ↓۱°
د هوا کیفیت: منځنی
غړي

د کندهار د پوهنې رياست له ګڼو ستونزو سره مخ دى

· ۴ دقیقې لوستل · ۱۱۵ کتنې

کندهار ښار(پژواک،١٥وږى٩٥): په کندهار کې سږنى تعليمي کال په داسې حال کې پيل شو چې د کتابونو او ښوونکو د تشکيل د کمښت تر څنګ ١٣٩ ښوونځي تړلي ١٩٠ يې ودانۍ نه لري.

د نوي تعليمي کال د پرانيستې مراسم د کندهار ښار په احمد شاه بابا ليسه کې جوړ شوي وو چې په کې د کندهار د مرستيال والي عبدالعلي شمسي تر څنګ د ولسمشر سلاکار حاجي اغالالي دستګيري، د ولايتي شورا استازو، قومي مشرانو، زده کوونکو او ښوونکو ګډون کړى وو.

د کندهار د پوهنې رياست وياند نظر محمد صميمي پژواک خبري اژانس ته وويل، د دوبي له رخصتيو وروسته تعليمي کال په داسې حال کې پيلوي چې له لومړي تر دوولسم ټولګي د کتابونو له کمښت سره مخ دي.

هغه زياته کړه، د پوهنې وزارت ژمنه کړې چې د نورو ولايتونو تر څنګ به کندهار ته هم کتابونه رسوي، خو تر دې مهاله دا کار نه دى شوى.

نوموړي د دې تر څنګ د ښوونکو د تشکيل کمښت هم يوه جدي ستونزه وګڼله او ويې ويل، شاوخوا ١٨٠٠ ښوونکو ته اړتيا ده چې په ښوونځيو کې په دندو وګومارل شي.

د ده په خبره، په ولسواليو کې ډېرى ښوونځي د همدې ستونزې له امله تړلي پاتې دي.

نوموړى وايي، کندهار په خپل تشکيل کې ٤٦٠ ښوونځي لري چې له دې ډلې ٣٢١ يې پرانيستي او ١٣٩ يې د بېلابېلو ستونزو له امله تړلي پاتې دي.

خو ده دا هم وويل چې د ٣٢١ پرانيستو ښوونځيو له ډلې ١٩٠ ښوونځي ودانۍ نه لري چې له امله يې زده کوونکي او ښوونکي له سختو ستونزو لاس او ګرېوان دي.

دى وايي، د پوهنې وزارت ته له تېرو څو کلونو راهيسې په لومړي ګام کې د ٤٠ ښوونځيو لپاره د ودانيو جوړولو پلان لېږل شوى، خو تر اوسه په دې اړه عملي اقدام نه دى شوى.

دى وايي، د ودانيو د نشتوالي له امله زده کوونکي په خېمو کې زده کړې کوي، خو له بده مرغه چې په دې وروستيو کې خېمې هم نه لري.

صميمي دغه راز د دوو ولسواليو (رېګستان او ښوراوک) يادونه هم وکړه چې هيڅ ښوونځي په کې نشته.

د نوموړي په وينا، په يادو شوو ولسواليو کې د ناامنيو، د تشکيل د کمښت او د لارې د خرابوالي له امله ښوونځي نه دي جوړ شوي.

خو ده وويل، چې په ګڼو ولسواليو کې د ډونرانو په مرسته د محلي يا سيمه ييزو ټولګيو د جوړولو لړۍ پيل شوې چې کېداى شي دغه لړۍ يادو دوو ولسواليو ته هم وغځول شي.

د ده په خبره، د زده کړې سيمه ييز ټولګي په هغو سيمو کې جوړ شوي چې اوسېدونکي يې ښوونځيو ته لاسرسى نه لري.

خو هغه هيله وښودله چې له ستونزو سربېره به سږ کال ٢٧ زره ماشومان د جديد الشمول زده کوونکي په توګه ښوونځيو ته لاره وکړي.

اوس مهال د کندهار په ٣٢١ پرانيستو ښوونځيو کې ٢٧٠ زره نجونې او هلکان زده کړې کوي.

نوموړي دا هم وويل چې سږ کال د کتابونو او ښوونکو د کمښت ستونزه هوارول، په ولسواليو کې د ښوونکو لپاره روزنيز پروګرامونه جوړول، د تعليمي کال په اوږدو کې د ٣٠ تړلو ښوونځيو بيا پرانيستل، د يو شمېر ښوونځيو د ودانيو ترميمول او نور د پوهنې رياست په لومړيتوبونو کې دي.

د کندهار مرستيال والي عبدالعلي شمسي وويل، خلک بايد د خپلو اولادونو د غوره راتلونکي لپاره لاس په کار شي او له ولايتي ادارې سره په ګډه سږ کال د پوهنې په برخه کې مثبت بدلونونه راولي.

هغه د پوهنې په بهير کې شته ستونزې، فساد او درغلي ومنله خو زياته يې کړه چې ولايتي اداره د پوهنې د بهير د غوره والي او اصلاح لپاره قوي اراده لري.

د يادونې ده چې د کندهار د پوهنې په رياست کې له ډېره وخته د پراخو درغليو او فساد په اړه شکايتونه کېږي.

تېره اوونۍ ولايتي ادارې د کندهار ولايت د پوهنې رييس عبدالقادر پيوستون او تدريسي مرستيال محمد عوض نظري د خلکو د هغو شکايتونو پر بنسټ چې ګواکې په دې اداره کې پراخ فساد شتون لري او مسوولين يې لازم خدمات نه شي وړاندې کولاى، له دندو لرې کړل.

د کندهار د والي وياند صميم خپلواک وايي، له بده مرغه د کندهار په پوهنې رياست کې له ډېره وخته پراخ فساد شتون لري، دغلته مافيايي کړيو ځالې جوړې کړې چې د اصلاح او سمون لپاره يې هلې ځلې روانې دي.

هغه په دې برخه کې د والي له خوا د مشورتي بورډ جوړېدل ياد کړل چې د پوهنې بهير له نژدې څارې او د ستونزو د هواري لپاره يې کار کوي.

غړي

You need to subscribe to view the full article. Please login or register a new account.

اړوند خبرونه

ټول ښوونه او روزنه