کابل (پژواک، ١٤ غبرګولى ٩٧): د افغانستان د علماوو له خوا د جګړې ضد تر ورکړل شوې فتوا وروسته به د پاکستان او افغانستان او بيا د ټولې نړۍ علماء په دې اړه فتوا ورکوي.
شاوخوا درې زره ديني عالمانو چې له ټول هېواده راغلي وو، د غبرګولي په ١٤مه د کابل د لويې جرګې په خېمه کې د يوې لويې غونډې په ترڅ کې روانه جګړه او ځانمرګي بريدونه حرام اعلان کړل.
دوى په ٢٦ مخونو او اوو مادو کې د روانې جګړې په اړه فتوا صادره کړه.
تېره مياشت په اندونيزيا کې د افغانستان، پاکستان او اندونيزيا د علماوو د ګډې غونډې پر مهال پرېکړه شوې وه چې د افغانستان ديني عالمان بايد د روانې جګړې پر ضد فتوا ورکړي.
تر دې مخکې د پاکستان ديني عالمانو هم په دې اړه يوه فتوا ورکړې وه.
د پاکستان نږدې دوو زرو ديني عالمانو د ١٣٩٦ لمريز کال د مرغومي په مياشت کې (جنوري ، ٢٠١٨) په يوه ګډه فتوا کې ترهګري او ځانمرګي بريدونه حرام اعلان کړي وو.
دغه هر اړخيزه فتوا چې د (پيغام پاکستان) تر نامه لاندې په کتابي بڼه هم چاپ شوې، د پاکستان په بېلابېلو ديني مذهبي ډلو پورې اړوند ١٨٢٨ علماوو له خوا پرې لاسليکونه شوي چې په کې د اهل سنت، اهل تشيع، سلفيانو او نورو مذهبي ډلو علماء شامل دي.
په دې فتوا کې راغلي چې ځانمرګي بريدونه، سخت دريځي او د خلکو وژل، په ځمکه کې له فساد سره برابر دي او د دې ډول ډول او خلکو پر وړاندې اقدامات کول د دولت حق ګڼل شوى دى.
په فتوا کې راغلي: ((د جهاد حکم يواځې دولت ورکولى شي او څوک چې په شخصي توګه دا کار کوي، هغوى باغيان دي.))
دغه راز د پاکستاني علماوو په دې فتوا کې راغلي چې ترهګرۍ ته خلک هڅول، ځانمرګو بريدونو ته خلک تيارول، روزنه ورکول او بيا ترسره کول یې، د اسلام د لارښوونو خلاف او عملي کوونکي يې باغي دي.))
د افغانستان زرګونو عالمانو په نننۍ غونـډه کې د پاکستاني عالمانو فتوا هم تاييد کړه.
د سولې او علماوو د عالي شوراګانو يوې سرچينې د غبرګولي په ١٤مه پژواک خبري اژانس ته وويل چې د زرګونو افغان علماوو فتوا به د پاکستان له علماوو سره په يوه ګډه لويه غونډه کې شريکېږي چې له دواړو هېوادونو به په کې شاوخوا ٥٠٠ علماء ګډون کوي.
د سرچينې د معلوماتو له مخې، له هغه وروسته به د روان زېږديز کال د جولاى په مياشت د سعودي عربستان په مکې مکرمې ښار کې د نړۍ د ديني عالمانو غونډه جوړېږي چې په کې به د اټکل له مخې د ٣٦ هېوادونو ١٢٠ تنه ديني عالمان ګډون کوي.
د علماوو شورا ياده سرچينه وايي چې د مکې په کنفرانس کې به د اندونيزيا، د افغانستان، د افغانستان او پاکستان د علماوو د ګډ کانفرانس په رڼا کې په افغانستان کې د روانې جګړې پر ضد يوه ګډه فتوا صادرېږي.
يوې بلې سرچينې پژواک ته وويل، سعودي هڅه کوي، چې د مکې په کنفرانس کې د طالبانو اړونده عالمانو ته هم د ګډون بلنه ورکړي.
سرچينه وايي چې د افغانستان د علماوو يو شمېر پلاوو له طالبانو سره اړيکې نيولې او هڅه يې کړې چې دغه فتوا ورسره شريکه کړي او هغوى ننګوي چې په دې اړه مناظرې ته حاضر شي.
د افغانستان د بهرنيو چارو وزارت وياند صبغت الله احمدي څو ورځې مخکې پژواک ته ويلي وو چې د افغانستان حکومت د نړۍ د نورو هېوادونو له علماوو سره په اړيکه کې دى، څو د دې نامشروع جګړې پر ضد فتواوې ورکړي.
هغه هيله څرګنده کړه چې په نورو اسلامي هېوادونو کې هم په دې اړه اجماع رامنځته شي او علماء په دې اړه فتواوې ورکړي او د جدې کنفرانس کې پراخه ونډه واخلي.
احمدي وايي چې د افغانستان ټول علماء روانه جګړه نامشروع ګڼي.
غړيYou need to subscribe to view the full article. Please login or register a new account.
