پل علم (پژواک، ۱۶چنګاښ۹۷) : د لوګر د پوهنې رياست چارواکي وايي چې وسله والو طالبانو په محمداغې ولسوالۍ کې د هلکانو او نجونو ٣٩ ښوونځي تړلي چې له امله يې ١٥ زره زده کوونکي له زده کړو بې برخې پاتې دي.
ددې ولايت د پوهنې رياست وياند شاپور عرب د چنګاښ په ١٦مه، پژواک خبري اژانس ته وويل چې وسله والو طالبانو ياد ښوونځي د محمداغې ولسوالۍ په بېلا بېلو سيمو کې تړلي او ګواښ يې کړى چې که حکومت يې د خلاصولو هڅه وکړه؛ نو وبه سوځول شي.
عرب وايي : ((نن د۳۹ ښوونځيو دروازې وتړل شوې او شاوخوا ۱۵۰۰۰ هلکان او نجونې له ازموينې پاتې شوې.))
د هغه په وينا، وسله والو طالبانو دغه کار د افغان امنيتي ځواکونو له خوا د وروستيو عملياتو په غبرګون کې کړى دى.
نوموړى وايي، خو دوى هڅه کوي چې د قومي مشرانو په همکارۍ دغه ستونزه هواره کړي.
عرب وويل، په تړل شويو ښوونځيو کی د محمداغې د هلکانو عالی لېسه ، مغل خېلو د هلکانو او نجونو ، زرغون ښار د هلکانو او نجونو ، سفيد سنګ د هلکانو او نجونو لېسه ، دهنو د هلکانو ، بي بي عايشې نجونو لېسه او نور شامل دي.
د هغه په وينا، په محمداغې ولسوالۍ کې ټول ۶۴ ښوونځی شته چی د ۱۳۵۰۰ نجونو په ګډون ۳۴۵۰٠۰ تنه په کی زده کړې کوي .
د محمداغې د عالي لېسې ښوونکي نورمحمد پژواک ته وويل چې طالبانو د پوهنې امريت ته تېره ورځ امر کړى و چې د چهار ونيم ماه ازموينو په لومړۍ ورځ دې ښوونځي وتړي.
هغه زياته کړه چې نن ددوى په ګډون ګڼ شمېر ښوونځي وتړل شول.
دى وايي : (( که موږ د طالبانو امر ونه منو، وژل کېږو.))
د دهنو د هلکانو لېسې زده کوونکي جلال الدين پژواک ته وويل چې نن يې ښوونځى تړلى و او دوى له ازموينې پاتې شول.
د لوګر د والي وياند شمشاد لاروي دا ومنله چی محمداغې ولسوالۍ کی وسله والو طالبانو د ښوونځی د تړلو امر کړی چی له امله يې ۳۹ ښوونځي تړل شوي دي .
هغه وايي (( طالبان د ښوونځيو تړلو څخه پر دولت د فشار د وسيلې په توګه ګټه اخلي ، خو موږ هڅه کوو چې دا ستونزه هواره کړو.))
وسله والو طالبانو لا تر دې دمه په دې اړه څه نه دي ويلي.
د يادونې ده چې تر دې مخکې طالبانو ددغه ولايت په خروار ولسوالۍ او نورو سيمو کې هم ښوونځي تړلي وو.
غړيYou need to subscribe to view the full article. Please login or register a new account.
