منځپانګې ته تلل
سه‌شنبه ۱۷ نومبر ۲۰۲۶ · کابل ۱۰:۳۲ غ.م
۱۱°صاف · ↑۱۴° ↓۱°د هوا کیفیت: منځنی
غړي

د کتابونو، مسلکي ښوونکو او ودانیو کمښت د کندهار د پوهنې بهیر له ستونزو سره مخامخ کړی

· ۳ دقیقې لوستل · ۹۱ کتنې

کندهار (پژواک، ۱۵ تله ۹۷): د کندهار د پوهنې رییس وايي، د کتابونو، مسلکي ښوونکو او ودانیو کمښت په دې ولایت کې د پوهنې د بهیر پر وړاندې جدي ستونزې دي.

هغه د پوهنې له وزارته د دغو ستونزو د هواري غوښتنه وکړه.

د کندهار د پوهنې ريیس عبدالقادر پیوستون چې نن د تلې په ۱۵مه یې د ولایت مقام په مطبوعاتي دفتر کې یې خبري غونډې ته معلومات ورکول، وویل، د کتابونو، مسلکي ښوونکو او ودانیو کمښت په دې ولایت کې د پوهنې بهیر اغېزمن کړی دی.

هغه زیاته کړه، د کندهار د پوهنې ریاست شاوخوا ۲ میلیونه کتابونو ته اړتیا لري، خو تر دې مهاله وزارت ورته ۲۴ زره کتابونه ورکړي چې بسنه نه کوي.

دغه راز ده یادونه وکړه چې په ولسوالیو او لرې پرتو سیمو کې د مسلکي ښوونکو نشتوالی هم جدي ستونزه ده چې په دغو سیمو کې یې د پوهنې د بهیر معیار را ټیټ کړی دی.

خو د ده په خبره، پر دغې ستونزې سربېره یې هڅه کړې چې په کندهار ښار کې ليسانس او له څوارلسم ټولګي فارغ ښوونکي په دندو وګوماري.

ده وویل، چې په دې لړ کې یې د شاوخوا ۵۰۰ ښوونکو ارزونه کړې ده.

پيوستون د ښوونځیو لپاره د ودانیو د نشتوالي په اړه وویل، د دې ولایت ۵۰ سلنه ښوونځي ودانۍ نه لري او ان په کندهار ښار کې هم ډېری زده کوونکي په خېمو کې زده کړې کوي.

د معلوماتو له مخې، په کندهار کې د ۳۵۱ ښوونځيو له ډلې یواځې ۲۰۷ ښوونځي ودانۍ لري او پاتې هیڅ ودانۍ نه لري.

د پوهنې رییس د ستونزو تر څنګ د یو لړ پرمختګونو خبر هم ورکړ.

ده وویل، پلان لري په راتلونکي کال کې د ښوونځیو لپاره د نوو ودانیو د جوړولو او ترمیم ۷۷ پرژوې پلې کړي.

هغه زیاته کړه، په ښار او څو ولسواليو کې يې ۶۰ جريبه ځمکه له ولايتي ادارې او خلکو تر لاسه کړې څو د ښوونځيو لپاره پرې ودانۍ جوړې کړي چې ۱۰ به یې د نجونو د ښوونځيو لپاره وي.

دی وايي، له دې جملې د ۱۰ پروژو کار په عملي ډول په ښار او يو شمېر ولسواليو کې روان دی چې ژر به ګټې اخیستنې ته وړاندې شي.

پيوستون په کندهار کې د پرانیستو ښوونځیو په اړه هم معلومات ورکړل او ویې ویل چې سږ کال په ولسوالیو کې ۳۰ نوي ښوونځي فعال شوي چې له دې سره په دې ولایت کې د فعالو ښوونځیو شمېر ۳۸۱ ته رسېږي، په داسې حال کې چې تېر کال دغه شمېر ۳۵۱ و.

نوموړي یادونه وکړه چې د سږني تعلیمي کال له پیل راهیسې تر دې مهاله ۴۰ زره نوي زده کوونکي (نجونې او هلکان) ښوونځیو ته شامل شوي او دا لړۍ روانه ده.

هغه زياته کړه، ۲۷۸۳ تنه د ډېر عمر لرونکي کسان چې زده کړې يې نه درلودې، د شپې په لېسو کې شامل شوي دي.

ده وویل، تېر تعليمي کال د پوهنې تر سکتور لاندې د ټول کندهار په کچه د بېلابېلو پروګرامونو له لارې د ټولو فارغانو شمېر ۱۰ زره تنه وو چې له دې ډلې ۷ سوه تنې نجونې وې، په داسې حال کې چې په تېر کال کې دا شمېره تر ۲ سوه نه اوښته.

نوموړي دغه راز خبر ورکړ چې کندهار لومړی ولايت دی چې د ام پيسه (اسان خدمت) له بانکي سيسټم څخه برخمن شوی او تر دې مهاله ۲ زره ښوونکي تر همدې پوښښ لاندې راوستل شوي او له همدې لارې معاش تر لاسه کوي.

غړي

You need to subscribe to view the full article. Please login or register a new account.

اړوند خبرونه

ټول ښوونه او روزنه