کندهار (پژواک، ۱۲ لړم ۹۷): کندهار مېشتي خبریالان وايي چې که څه هم په قوانینو کې د بیان ازادۍ له اصل څخه کلک ملاتړ شوی، خو په ځینو سیمو کې ناامني، د زورواکانو فعالیتونه او د قانون نه حاکمیت د خبریالانو کار او ژوند ته جدي ګواښونه دي.
خبریالانو دغه څرګندونې په هغه غونډه کې وکړې چې نن د لړم په ۱۲مه د خبریالانو پر وړاندې د تاوتریخوالي د مخنیوي د نړیوالې ورځې په مناسبت په ولایت مقام کې جوړه شوې وه.
په دې غونډه کې چې د خبریالانو او مدني فعالانو تر څنګ په کې د کندهار مرستيال او سرپرست والي عبدالحنان منيب، په ټولنيزو چاور کې د ولايت مقام مرستيال حاجي اغالالي دستګيري، د ولايتي شورا ریيس او نورو ګډون کړی وو، د کندهار ملي راډيو ټلوېزيون کامره مين سليم رحيم هم ونمانځل شو چې په وروستۍ پېښه کې یې ژوند له لاسه ورکړی و.
په سوېل کې د افغان خبریالانو د خوندیتوب د کمېټې مسوول احمد لودین وویل، په کندهار او سوېلي ولایتونو کې د خبریالانو ژوند له ګواښ سره مخ دی چې حکومتي ادارې یې باید خوندیتوب ته جدي پاملرنه وکړي.
هغه زیاته کړه، په کندهار کې د عبدالمنان ارغند ترور او په دې وروستیو کې د سلیم رحیم وژل کېدو وښودله چې د خبریالانو ژوند له بل هر وخت څخه په خطر کې دی او هغوی د خپلو سرونو په بیه کار کوي.
ده وویل، دا سمه ده چې په قوانینو کې د بیان ازادۍ له اصل څخه کلک ملاتړ شوی، خو په ځینو سیمو کې ناامني، د زورواکانو فعالیتونه او د قانون نه حاکمیت د خبریالانو کار او ژوند ته جدي ګواښونه دي.
سرپرست والي عبدالحنان منیب وویل، په اوسنۍ نړۍ کې رسنۍ د څلورم ځواک په توګه مطرح دي چې د ذهنیت جوړولو، د هغوی په کنټرول او اوښتون کې مهم رول لري.
ده زیاته کړه، د رسنیو او خبریالانو پر وړاندې هغه مهال خنډونه او ګواښونه کمېدای شي چې هغوی بې پرې او مسلکي و اوسي.
نوموړي یادونه وکړه چې ولایتی اداره د خبریالانو خوندیتوب او د هغوی پر وړاندې د هر راز تاوتریخوالي مخنیوي ته ژمنه ده او په دې برخه کې یوه کمېټه هم جوړه شوې چې وخت په وخت ناستې کوي.
په کندهار کې د بشر حقونو د خپلواک کمېسیون سرپرست فخرالدین فایض وویل، له ژوند وروسته د بیان ازادي دویم لوی ارزښت دی او خبریالان د بیان د ازادۍ اصلي ممثلین دي.
ده وویل، خبریالان د هر ظالم پر وړاندې د مظلوم غږ پورته کوي او د دوی پر وړاندې هر ډول برید د انسانیت او بشریت پر وجدان برید دی او په هیڅ توګه نه شي توجیه کېدای.
نوموړي یادونه وکړه چې حکومت د خبریالانو پر وړاندې د تعهد، اجزا او تسهیل درې بنسټیزې دندې لري، په دې معنا چې د خبریالانو او رسنیو فعالیتونه به نه محدودوي، د هغو اشخاصو او کړیو لاس باید ونیسي چې خبریالانو ته ستونزې جوړوي او په کاري برخه کې باید ورته اسانتیاوې جوړې ان که د حکومت د یوې نقیصې د راسپړلو په برخه کې هم وي.
په غونډه کې د کندهار ملي راډیو ټلوېزیون د کامره مېن سلیم رحیم یاد هم تازه شو چې دوه اوونۍ مخکې یې د ولایت مقام کې په یوه بريد کې د امنیه قوماندان او ملي امنیت له رییس سره یو ځای ژوند له لاسه ورکړ.
په دې غونډه کې د هغه د کارونو ستاینه او یادونه وشوه او روح ته یې دعا وشوه.
دغه راز د خبریالانو د خوندیتوب د کمېټې له خوا د هغوی له کورنۍ سره ۵۰۰ ډالر مرسته هم وشوه او له حکومت څخه هم وغوښتل شول چې د هغه له کورنۍ سره مرسته وکړي.
د یادونې ده چې افغانستان د نړۍ په کچه د بيان د ازادۍ په برخه کې ۱۱۸ مقام لري.
خو تېر ۲۰۱۷ او روان ۲۰۱۸ زېږدیز کلونه د ټولې نړۍ په کچه په افغانستان کې د خبریالانو لپاره خونړي کلونه دي چې په اوږدو کې یې۳۴ کورني او بهرني خبريالان وژل شوي او لسګونه نور ګواښل شوي او يا دندې پرېښودو ته اړ ایستل شوي دي.
غړيYou need to subscribe to view the full article. Please login or register a new account.
