کابل (پژواک، ۵ غبرګولی ۹۸): د ښځو چارو وزارت د ښځو پر وړاندې د ناسم چلند او د ښځو د وژنو د زیاتېدو په اړه اندېښنه څرګندوي او وايي، په تېرو دوو میاشتو کې د ښځو د وژنو د اوو قضیو په ګډون په دغه وزارت کې له ښځو سره د تاوتریخوالي ۱۵ قضیې ثبت شوې دي.
د ښځو چارو وزارت د پلان او پالیسۍ مرستیاله سپوږمۍ وردګ په کابل کې د ښځو د وژنو وروستیو پېښو په تړاو جوړ شوي کنفرانس ته وویل، په تېرو دوو میاشتو کې د اوو ښځو د وژنې په ګډون له ښځو سره د سخت تاوتریخوالي ۱۵ قضیې ثبت شوې دي.
هغې زیاته کړه، له یادو ۱۵ قضیو څخه اووه د وژنې او نور د صحرايي محکمو، اجباري نکاح، د ښځو او ماشومانو د پلورلو، ډله ییز تېري او له دوو نجونو سره د طالبانو له خوا د ناوړه چلند موارد دي.
هغې وویل، د تاوتریخوالي تر ټولو زیاتې پېښې په سرپل ولایت کې رامنځته شوې دي.
وردګ روښانه کړه چې د یادو قضیو په تور یواځې په سمنګان کې پر یوه قابلې د ډله ییز تېري اته شکمن کسان او د صحرايي محکمې په تور درې نور کسان نیول شوي دي.
له ښځو سره د تاوتریخوالي په چارو کې د مبارزې په برخه کې د لوی څارنوال مرستیالې سینا شنا وویل، په وروستیو میاشتو کې د ښځو پر وړاندې تاوتریخوالی زیات شوی دی.
نوموړې د مینې ګل د وژنې په اړه وویل، د منګل د وژنې په تور دوه کسان چې یو د کابل او بل د بغلان ولایت اوسېدونکي دي، نیول شوي، د لویې څارنوالۍ له خوا ټاکل شوي پلاوي خپلې څېړنې بشپړې کړې دي.
د شمشاد، لمر او اریانا ټلوېزیونونو مخکنۍ کارکوونکې مینه منګل چې تازه یې د ولسي جرګې د فرهنګي برخې د مشاوریت پر پوسټ دنده پیل کړې وه، د غويي په ۲۱ مه د کابل ښار په اتمه ناحیه کې ناپېژندو وسله والو ووژله.
نوموړې وویل، په سمنګان ولایت کې پر قابلې د ډله ییز تېري پېښه تر څېړنو لاندې ده.
د غويي په ۳۱ مه د سمنګان ولایت روی دواب ولسوالۍ کې پر یوې قابلې د ډله ییز تېري په تور نهه کسان نیول شوي دي.
هغه روښانه کړه، د پریسا قضیه چې څه موده وړاندې په کابل ښار کې له شپږم منزل څخه راغورځول شوې وه، لویې څارنوالۍ ته لېږل شوې ده.
د پریسا په نوم یوه حامله ښځه تېره سه شنبه (د غويي ۲۴ مه) د کابل ښار په لسمه امنیتي حوزه کې له یوې شپږ پوړیزې ودانې څخه لاندې راغورځول شوې وه او په روغتون کې یې ساه ورکړه.
غړيYou need to subscribe to view the full article. Please login or register a new account.
