کابل (پژواک، ۵ تله ۹۸): پولیس وايي، د کابل ښار د یوولسمې امنیتي حوزې په مربوطاتو کې د ماین چاودنه شوې چې مرګ ژوبله نه لري.
د کابل د امنیې قوماندانۍ ویاند فرامرز فردوس د تلې په ۵مه پژواک خبري اژانس ته وویل چې دغه چاودنه نن له غرمې وروسته شاوخوا دوه بجې د خیرخانې مېنې د لومړۍ حصې ساحه کې د استاد خلیل الله خلیلي ښوونځي ته څېرمه رامنځته شوې ده.
د نوموړي په خبره، د یاد ماین چاودنې له امله چې د استوګني کورونو په یوه کوڅه کې ځای پر ځای شوی و، د نږدې کورونو ښیښې ماتې شوې، خو مرګ ژوبله یې نه ده اړولې.
فردوس پژواک ته وویل، پولیس د پېښې ساحې ته رسېدلي او اوس د دې پلټنه کوي چې دغه ماین د کومې موخې لپاره ځای پر ځای شوی و.
login or register a new account.
